Kryetarët e bashkive të PD-së nuk do të dalin nga zyrat e tyre deri në zhvillimin e zgjedhjeve në përputhje me Kushtëtutën.
Është ky vendimi që i është komunikuar kreut demokrat, Lulzim Basha, nga 15 kryetarët e bashkive të kësaj force politike, gjatë një takimi të zhvilluar në selinë e PD-së.
Mësohet se takimi që ka zgjatur rreth 60 minuta ka pasur në qendër të tij situatën politike dhe reagimin e opozitës, sipas një agjende të re, ku vëmendja do të përqëndrohet në shpalosjen e programit të kësaj force politike.
Burime nga opozita bëjnë të ditur se kreut demokrat i është bërë e qartë se asnjë prej 15 kryebashkiakëve të PD nuk ka ndërmend të dalë nga zyra dhe t´I dorëzojë detyrën kryebashkiakëve të dalë nga votimet e 30 qershorit, që nuk njihen nga opozita si një process ligjor dhe kushtetues zgjedhor.
Deri më tani Kolegji Zgjedhor ka shpërndarë mandatet për këshillat në 21 bashki, ndërsa ky proces do të mbyllet deri në javën e parë të gushtit.