Një bashkëpunëtor i Shërbimit Informativ Shtetëror në Durrës është arrestuar nga policia e këtij qyteti, me akuzën e “Armëmbajtjes pa lejë” dhe “Kallëzimit të rremë”. Graciano Hidri, mësohet të jetë shoqëruar në ambjentet e komisariatit të policisë Durrës, mbrëmjen e djeshme por sot atij i është deklaruar arrestimi dhe akuzat penale që rëndojnë mbi të. Zbulimi dhe arrestimi i Hidrit, i cili njihet në Durrës si bashkëpuntor i SHISH, është bërë gjatë hetimeve që policia dhe prokuroria janë duke ndjekur lidhur me arrestimin e një biznesmeni Polak, të quajtur Arkadiusz Modrzejewski, i cili kishte mbëritur në Durrës për çështje biznesi.
Mirëpo marja disa herë në pyetje i polakut tashmë të arrestuar për akuzën e “Mbajtjes pa lejë të armëve”, ka sjellë nxjerjen e emrin të Graciano Hidrit, për të cilin polaku Arkadiusz, ngrinte dyshime të forta dhe akuzonte se pistoleta tip TT e gjetur nga policia e Durrësit në makinën e tij, ishte futur qëllimisht nga miku i tij në biznes, Graciano Hidri, i cili sipas polakut hiqej si bashkëpuntor i Shërbimit Informativ Shtetëror në Durrës. Pas verifikimeve të bëra nga policia ka rezultuar se Hidri ishte përfshirë në këtë ngjarje të rëndë, duke future në makinën e mikut të tij Polak një pistoletë pa lejë, dhe më pas ka njoftuar zyrtarë të SHISH në Durrës dhe këta fundit ja kanë përcjellë informacionin policisë, e cila më pas arrestoi poshtë banesës së tij, shtetasin polak Arkadiusz Modrzejeëski. Gjatë hetimit është zbuluar se Graciano Hidri ka përdorin inspektorin e SHISH me inicialet A.S, të cilin e mbante në lidhje, me qëllim futjen në grackë të polakut tashmë të arrestuar, Arkadiusz Modrzejeëski. Hidri është një njohës i mirë i gjuhës polake dhe ka disa kohë që është larguar nga ky shtet, ku dyshohet se ndiqet nga policia për akuzën e “Mashtrimit” në Poloni.
Graciano Hidri
“Shqiptarja.com” mëson se polaku Arkadiusz Modrzejeëski, kryen aktivitet tregtar në Durrës, kryesisht me prodhimin e lojërave për fëmijë,si p.sh goditja me grusht dhe që pagesa e lojës bëhet me monedha (xhetona). Për shkak se një pjesë e këtyre lodrave automatike nuk i ka shitur, ka hapur një aktivitet në Shqipëri, duke i vendosur ato në plazhin e Durrësit. Për këtë aktivitet ai bashkëpunon edhe me dy polakë të tjerë Przemek dhe Krizstof. Gjatë kësaj kohe në Durrës janë njohur me një shqiptaro-polak, i cili quhet Graciano Hidri. Për shkak se njihte gjuhën shqipe dhe polake e kanë punësuar në aktivitetin e tyre duke i dhënë edhe çelësat e automateve për t’i kontrolluar e pastruar nga sendet false që hedhin njerëzit dhe fëmijët. Ky i fundit duke pasur çelësat ka arritur të vjedhë shumat financiare të grumbulluara në automate.
Kjo ka rënë në sy të ortakëve polakë pasi stononte mungesa e theksuar e lekëve nga ritmi i xhiros. Për këtë kanë akuzuar shqiptaro-polakun Hidri, i cili ndërkohë bënte të gjithë aktivitetin administrativ të shoqërisë në raport me entet shqiptare si Dogana, Tatime dhe QKR. Arkadiusz, është pronari që i ka dhënë me qira dhe që të shumtën e kohës qëndron në Poloni. Nga kjo situatë ka ardhur në Durrës, për të sqaruar e kërkuar lekët e automatëve ortakëve, të cilëve ua ka dhënë me qira. Polaku në ditët e para të korrikut 2019 është grindur me Graciano Hidrin, por e kanë frikë se ky i kërcënonte me largimin nga Shqipëria, përzenien e shantazhe te tjera rreth aktivitetit të shoqërisë, duke u hequr si i policisë dhe SHISH-it. Pas ardhjes së Arkdiusit, këtij të fundit i janë marrë çelësat e automateve. Rezulton se Arkadiusz ka ardhur me mjetin e tij nga Polonia, të cilin do ta linte këtu, pasi do kthehej në Poloni ditën e arrestimit dhe në fund të muajit do vinte me pushime së bashku me gruan.
Ditën e arrestimit në mëngjes pasi kanë ardhur nga Tirana, shqiptaro-polaku Hidri, i ka kërkuar Arkadiusz automjetin që të çonte në një pikë servisi për t’i salduar rrjedhjen e gazit në kondicioner dhe larë atë në një lavazh. Fillimisht Arkadiusz duke qenë edhe në shoqërinë e dy polakeve të tjerë dhe shqiptarit Artur Saliaj, që shërben pranë tyre po si përkthyes, ka hezituar më pas ja ka dhënë mjetin, dhe kanë qëndruar në kafe duke e pritur Hidrin. Pasi ka sjellë mjetin Hidri, Arkadiusz i ka kërkuar ta shoqëronte për të shkuar në Port, për të kryer disa veprime të nevojshme pune. Arkadiusz nuk ka pranuar dhe pasi i ka dorëzuar çelësin e makinës është ndarë prej tyre. Pas kësaj Arkadiusz ka vazhduar punën duke u shoqëruar me grupin dhe ndjekur punën.
Pasi kanë drekuar me dy polakët e tjerë dhe shqiptarin Artur Saliaj, është ndarë me to dhe ka marrë rrugën për në apartamentin e marrë me qira prej tyre ne qytetin e Durrësit, për të përgatitur bagazhet pasi në mbrëmje do nisej në Poloni me avion. Pranë shtëpisë së tij, e ka ndaluar policia e cila pasi i ka kërkuar dokumentet e ka nxjerrë nga makina dhe e ka hipur në furgon dhe ndërkohë kanë shkuar në portobagazh, ku kanë gjetur një leckë të mbështjellë, ku e kanë hapur dhe kanë nxjerrë andej një pistoletë. Arkadiusz i është treguar pistoleta e gjetur në makinë por ai nuk ka pranuar autorësinë e saj. Në shpjegimet që ka dhënë në polici ka shpjeguar se e gjithë kjo është një kurth i ngritur nga Graciano Hidri kundër tij, për shkak të lidhjeve që ky i fundit kishte me shërbimin e SHISH, me qëllim për t’iu marrë aktivitetin tregtar. Dëshmia e Arkadiusz, përputhen e mbështeten edhe nga deklarimet e polakëve të tjerë dhe shqiptarit Artur Saliaj. Pritet që në ditët në vijim Graciano Hidri të dalë para gjykatës së Durrësit për tu njohur me masën e sigurisë që do kërkojë prokuroria e këtij qyteti.
/Shqiptarja.com
