I arrestuari që shiste kokainë me doza në Elbasan u vu në pranga pasi mbahej prej ditësh në vëzhgim nga policia. Policia e Elbasanit e mbante në vëzhgim 39 vjecarin, pas informacioneve në rrugë operative se i riu merrej me shitje droge.
Për këtë qëllim u organizua operacioni i koduar “Bradasheshi”, ku E.R., 39 vjeç, u vu në pranga në kushtet e flagrancës, i cili akuzohet si shpërndarës i lëndëve të forta narkotike. 39-vjeçari ka qenë duke udhëtuar me mjet nga fshati Hajdaran për në qytetin e Elbasanit në momentin e ndalimit.
Ai është ndaluar nga Policia dhe ka lejuar këta të fundit, pa bërë rezistencë, për të kontrolluar mjetin. Gjatë kontrollit, Policia i ka gjetur dhe sekuestruar 50 doza lëndë narkotike e dyshuar e llojit kokainë, si dhe 7 aparate celularë, automjeti me të cilin lëvizte, 20,000 lekë të rinj, të cilat dyshohen se janë përfituar nga shitja e lëndës narkotike, shkruan Panorama.
Dyshohet se 39-vjeçari e ka kryer këtë aktivitet rishtas. Në mënyrë që Policia të mos e zbulonte përmes përgjimit, i riu ndërronte shpesh telefonat, për këtë arsye mbante me vete 7 aparate të ndryshëm. Pavarësisht kësaj, arrestimi i 39-vjeçarit erdhi pas informacioneve që Policia siguroi në rrugë operative.
“Në afërsi të fshatit Hajdaran, Elbasan, gjatë kontrollit fizik në automjetin me të cilin lëvizte shtetasi E.R., Policia gjeti dhe sekuestroi në cilësinë e provave materiale 50 doza lëndë narkotike e dyshuar e llojit kokainë; 7 aparate celularë, automjeti me të cilin lëvizte; 20,000 lekë të rinj, që dyshohen se janë përfituar nga shitja e lëndës narkotike”, bëhet e ditur nga Policia.
Materialet hetimore i kaluan Prokurorisë pranë Gjykatës së Shkallës Parë Elbasan, për veprën penale “Prodhimi dhe shitja e narkotikëve”.
PANORAMA
