Partia Socialiste, pritet t’i drejtohet Komisionit të Venecies për të marrë prej saj një opinion në lidhje me nismën për shkarkimin e Presidentit Ilir Meta.
E ndodhur në kushtet kur mazhoranca e ka të pamundur të shkarkojë Presidentin, ajo kërkon ndihmë nga Venecia.
Mësohet se letra është formuluar ditën e sotme nga Komisioni Hetimor dhe po sot ajo do të niset drejt Komisionit të Venecias.
Mazhoranca e mori nismën për shkarkimin e Presidentit, menjëherë pas anulimit prej tij të zgjedhjeve të 30 qershorit dhe dekretimit të datës së re të zgjedhjeve 13 tetor.
PS e konsideroi shkelje të rëndë të Kushtetutës, zhdekretimin e datës së zgjedhjeve dhe dekretimin e një date tjetër. Në vazhdën e kësaj situate, e cila ende nuk është zgjidhur, PS i drejtohet Venecias për një opinion.
