Kryeministri i dorëhequr, Ramush Haradinaj, ka deklaruar se s’do të ketë ndarje të vendit dhe as Dodik Republikë në Kosovë.
Ndërsa ka falenderuar të gjithë që e kanë përkrahur këto ditë lidhur me dorëheqjen pas ftesës që ka marrë nga Gjykata Speciale për intervistim, Haradinaj shkruan në rrjet se nuk është ndjerë asnjëherë vetëm.
“Faleminderit të gjithëve. Jeni shumë që më përkrahët këto ditë. Nuk jam ndier vetëm asnjëherë! Tregun për njohje, e jo ndarjen e Kosovës e as Dodik Republikë në Kosovë!”, shkruan Haradinaj.
Ai dha dorëheqje nga posti i Kryeministrit të Kosovës, të premten, ndërsa arsyeja ishte ftesa për intervistim nga Gjykata Speciale. Haradinaj ka bërë të ditur se do të niset për në Hagë këtë javë dhe se do të intervistohet në cilësinë e të dyshuarit.
Haradinaj dorëzon sot edhe formalisht dorëheqjen tek presidenti i Kosovës, Hashim Thaçi.
Pas dorëheqjes së Haradinajt pati reagime të shumta, ndërsa partitë politike tashmë kanë sytë nga presidenti për datën e re të zgjedhjeve.
Haradinaj po ashtu në vitin 2004, pati dhënë dorëheqje nga posti i Kryeministrit me të marrë ftesën nga Gjykata e Hagës.