Kolegji Zgjedhor vendosi sot të shpërndajë mandatet për këshilltarët bashkiakë, duke pranuar kërkesën e Partisë Socialiste, në një kohë që nga shoqata e bashkive, është depozituar një ankimim në Gjykatën Kushtetuese lidhur me ligjshmërinë e procesit të votimit të mbajtur më 30 qershor.
Partia Demokratike, përmes Sekretarit të Përgjithshëm, Gazmend Bardhi, iu drejtua Kolegjit me një letër, përmes të cilës kërkonte mosfillimin e procesit të shpërndarjes së mandateve për këshilltarët, deri në vendimin e Gjykatës Kushtetuese.
“Pa u shqyrtuar çështja në Gjykatën Kushtetuese, Kolegji Zgjedhor ka pengesë ligjore për të bërë shpërndarjen e mandateve të Këshillave monopartiake Bashkiake.
Shoqata e Bashkive ka depozituar në Gjykatën Kushtetuese një kërkesë për kushtetueshmërinë e votimeve të 30 Qershorit.
Sipas Kodit të Procedurës Civile, Kolegji Zgjedhor ka detyrimin ligjor të vendosë pezullimin e gjykimit, për shkak se “çështja nuk mund të zgjidhet para se të zgjidhet një çështje tjetër.”
Ligji detyron Kolegjin të nos marrë vendim pa u shprehur më parë Gjykata Kushtetuese mbi kushtetueshmërinë e Dekreteve të Presidentit”, thuhej në kërkesën e PD-së.
Por duket se kjo kërkesë nuk është marrë parasysh nga Kolegji Zgjedhor, i cili ka vijuar procedurën për shpërndarjen e mandateve.
PS kërkoi sot shpërndarjen e mandateve për Urën Vajgurore, e cila duket se do të jetë edhe bashkia e parë e kompletuar, ku pas certifikimit të mandatit të kryebashkiakut, pritet të formësohet edhe Këshilli Bashkiak.