Nga zgjedhje e parakohshme parlamentare në krye të Greqisë erdhi Kiriakos Micotakis me partinë “Demokracia e Re”.
Kjo qeveri ka folur për herë të parë për marrëdhëniet e saj me Shqipërinë.
Ministri i jashtëm i Greqisë, Nikos Dhendhias, nga foltorja e kuvendit ka thënë se nuk janë zbatuar marrëveshjet mes Shqipërisë dhe Greqisë. Ai ka lëshuar një paralajmërim, duke i kujtuar Shqipërisë se nuk integrohet dot në BE, po nuk plotësoi të drejtat e minoritetit grek.
“Nga dy marrëveshjet e rëndësishme të nënshkruara me Shqipërinë në vitin 2009, vetëm njëra filloi të zbatohet, marrëveshja për ndërtimin e varrezave ushtarake të rënëve tanë në vitin 1940. Ne presim zbatimin e saj të plotë. Shqipëria ende nuk ka zbatuar detyrimet e saj në lidhje me pakicat dhe të drejtat pronësore të minoritetit grek.
Për këtë arsye, në kontekstin e hapjes së negociatave të pranimit me Shqipërinë për të cilat BE-ja ka bërë kushtëzim të qartë, ne do të vazhdojmë të monitorojmë nga afër përmbushjen nga Shqipëria të 5 prioriteteve kryesore. Ne do të vazhdojmë të monitorojmë nga afër respektimin e të drejtave të njeriut dhe të drejtave pasurore të minoritetit”, ka thënë Dhendhia