Philip Reeker, ndihmës i Sekretarit amerikan të Shtetit, i njohur ndryshe si “diplomati që kryhen punë” do të angazhohet në një tur takimesh në Rajon nga datat 21-27 korrik.
Reeker do të jetë në Skup dhe Athinë, ndërsa ka shmangur Tiranën.
Referuar axhendës së takimeve, në Maqedoninë e Veriut, Reeker do të ketë takime me zyrtarët më të lartë, si me Presidentin Stevo Pendarovski, Kryeministrin Zoran Zaev, Ministrin e Jashtëm Nikola Dimitrov dhe përfaqësues të tjerë të qeverisë për të diskutuar çështjet bilaterale, por edhe proceset integruese të vendit në BE dhe NATO.
Ambasadori Reeker gjithashtu do të marrë pjesë në një diskutim me studentët në Këndin Amerikan në Manastir përveç takimeve të tij me deputetët, anëtarët e partisë opozitare dhe përfaqësuesit e qeverisë lokale.
Ndërsa, në Athinë, ambasadori Reeker do të takohet me ministrin e jashtëm Nikos Dendias dhe zyrtarë të tjerë të qeverisë për të diskutuar çështje thelbësore për marrëdhëniet dypalëshe duke përfshirë tregtinë dhe investimet, bashkëpunimin për sigurinë dhe mbrojtjen, stabilitetin rajonal dhe energjinë.
Ai gjithashtu do të marrë pjesë në një tryezë të rrumbullakët me sipërmarrësit dhe udhëheqësit e biznesit. Në Selanik, Ambasadori Reeker do të takohet me udhëheqës të pushtetit lokal, fetar dhe biznes.
Në turin 1 javor në Rajon, bie në sy fakti se Reeker ka shmangur takimet në Tiranë, ndërsa disa ditë më parë deklaroi se SHBA nuk do të arbitrojnë politikën e brendshme shqiptare.
“Gjithmonë kam një bast me stafin që nuk mund të kalojë një ditë pa më pyetur për Ballkanin. Kam kaluar shumë nga jeta ime personale dhe profesionale në Ballkan.
Shqipëria ka kaluar një periudhë të vështirë. Është aleat i NATO-s, kemi punuar ngushtësisht dhe kemi punuar fort me ta. Ky vend erdhi nga një eksperiencë unike, pasi dolën nga era e Hoxhës, një eksperiencë e ndryshme nga vendet e tjera gjatë Luftës së Ftohtë. SHBA kanë qenë miku më i mirë i Shqipërisë, kemi punuar fort për ta futur në rrugën e anëtarësimit në NATO. Jemi krenarë për këtë fakt.
Jemi krenarë për Shqipërinë. Por nuk jam krenar për shqiptarët gjatë javëve të fundit. Nuk mund të bojkotosh parlamentin, ose të lësh mandatet.
Duhet të përdorësh këto institucione, duhet të përdorësh gjykatat, duhet të caktosh anëtarët e Gjykatës Kushtetuese, që të përdorësh këto mjete për të kaluar këto kohëra të vështira politike.
SHBA nuk do të arbitrojnë politikën e brendshme shqiptare, por do të vazhdojmë të inkurajojmë të gjithë palët që të punojnë së bashku me institucionet dhe të bëjnë hapat e duhur për të kaluar këtë me mjetet kushtetuese që keni.
Duhet të mbajmë mend që ne në SHBA, na u desh ca kohë që të bëjmë gjërat mirë. Nuk kemi thënë se është kryer kjo gjë apo është perfekt. Por institucionet janë çelësi“,tha Reeker.
