Ardian Kuka, 37 vjeçari, që dy ditë më parë vrau bashkëshorten e tij duke e masakruar me thikë në sy të djalit 8-vjeçar, u gjet mëngjesin e së shtunës i mbytur në Sektorin Rinia në plazhin e Durrësit.
Trupi i pajetë i 37-vjeçarit të shpallur në kërkim nga policia u gjet nga pushues që njoftuan më pas policinë.
Kjo e fundit, sikundër raportohet ka gjetur në automjetin me të cilin autori ishte larguar nga banesa pasi kreu krimin edhe një letër, e cila po i nënshtrohet ekspertizës.
Referuar asaj që raportohet në letër është shkruar arsyeja e krimit.
“Ajo kishte filluar të vishej bukur dhe me klas”, thuhet në letrën e gjetur, që dyshohet se është lënë nga autori.
Letra u gjet në sediljen e makinës, ndërsa duket se motivi i krimit është xhelozia.
Gruaja, Hazbie Kuka, u qëllua 6 herë me thikë nga bashkëshorti i saj, në banesën e çiftit. Viktima u transportua drejt Spitalit të Durrësit nga dy vëllezërit dhe djali i saj, por, fatkeqësisht, nuk arriti t’u mbijetonte plagëve të marra. Ajo ndërroi jetë pak çaste pasi mbërriti në duart e bluzave të bardha.
