Nga Boldnews.al
Kryetari i Këshillit të Lartë të Prokurorisë, Gent Ibrahimi, ka bërë thjesht një lexim të ligjit për SPAK, në një intervistë të dhënë për eminentin mediatik gjerman “Dojce Velle”, në programin shqip.
Ibrahimi, ish-ekspert i nivelit të lartë gjatë diskutimeve të Reformës në Drejtësi, është ndër të parët e tillë që morën post drejtues në institucionet e reja, pavarësisht se fillimisht ishte menduar që hartuesit të mos ishin përfitues të drejtëpërdrejtë të legjislacionit të ri.
Në intervistë për “D-Velle”, kreu i KLP, Ibrahimi, shpjegoi hapat se si do të ngrihet Prokuroria e Posaçme, SPAK, tashmë që institucioni që ai drejton ka përzgjedhur 15 kandidatët e parë për prokuror në këtë njësi.
Por, gjatë intervistës, Ibrahimi, në pjesë të veçanta, u prezantua si njohës i mirë i çështjeve që janë në trajtim aktualisht nga Prokuroria për Krime të Rënda, strukturë që do të shkrihet me krijimin e SPAK.
Nën petkat e drejtuesit të Krimeve të Rënda, detyrë që as nuk e ka dhe as nuk mund ta ushtrojë, Gent Ibrahimi foli i bindur se “…SPAK do të trashëgojë nga Prokuroria e Krimeve të Rënda rreth 90 % të portofolit të kësaj prokurorie, p.sh. do të vijojë hetimin e pastrimit të parave nga ish-Prokurori i përgjithshëm Adriatik Llalla. Besimi i publikut tek SPAK do të sjellë kallzime të reja penale. Vetë prokurorët e SPAK, shpresoj të gjejnë guximin të aktivizojnë ҫështje të fjetura…”.
Pra, Ibrahimi duket njohës i mirë i zhvillimeve aktuale në Prokurorinë e Krimeve të Rënda e që do pasohen tek SPAK.
Por, ai nuk zgjodhi të përmend që SPAK-u i pritshëm do të ketë objekt të tij çështje shumë të rëndësishme, me impakt të fuqishëm politik dhe social, siç janë dosjet “339” dhe”184″.
Nga përgjimet e publikuara në mënyrë periodike nga “VOA” dhe gazeta gjermane “Bild” janë zbuluar të dhëna për bashkëpunimin e zyrtarëve shumë të lartë të qeverisjes së Partisë Socialiste me anëtarë të grupeve kriminale për vjedhje e blerje votash.
Publiku shqiptar ka dëgjuar përgjime të dosjeve “339” dhe “184”, me të dhëna kompromentuese për Damian Gjiknurin, Ulsi Manjën, Vangjush Dakon, një tabor zyrtarësh policorë e të administratës së “Rilindjes”.
Këto përgjime janë fakte që dëshmojnë se si Partia Socialiste fitoi pushtetin në mënyrë abuzive në zgjedhjet e përgjithshme të vitit 2017.
Këto përgjime janë gjithashtu arsyeja se përse vende të ndryshme të Bashkimit Europian janë skepktike për hapjen e negociatave me Shqipërinë, një proces për të cilin Gent Ibrahimi shprehet se po angazhohet për të dhënë kontributin e tij.
Por, në intervistën e tij nën rolin e “drejtuesit” të Krimeve të Rënda e SPAK-ut bashkë, Gent Ibrahimi, me shumë mundësi, nuk ka guxuar t’i përmendë.
Gent Ibrahimi u zgjodh në krye të Këshillit të Lartë të Prokurorisë vetëm me votat e deputetëve socialistë, në kundërshtim me ligjin.
Operacioni Ndërkombëtar i Monitorimit (ONM) konstatoi se ai nuk plotësonte kriteret ligjore për të qenë anëtar i KLP.
Megjithatë, Partia Socialiste, me forcën e kartonëve parlamentarë, e zgjodhi Ibrahimin si pjesë e Këshillit të Lartë të Prokurorisë.
Para se të zgjidhej në KLP, Gent Ibrahimi njihej si jurist i projekteve të Soros dhe si kunati i eksponentes së lartë të Partisë Socialiste, Mimi Kodheli.
