Avokati i Shoqatës së Bashkive, Jordan Daci, u shpreh se i është drejtuar me një kërkesë Gjykatës Kushtetuese, përmes së cilës synohet “konstatimi i paligjshmërisë së zgjedhjeve të datës 30 qershor” dhe kryetarëve të dalë nga këto votime.
“Kërkesa në Kushtetuese ishte rekomandim i ndërkombëtarëve që thanë se duhen përdorur mjetet institucionale dhe Gjykata Kushtetuese është mjet i tillë.
Shpresoj që gjykata do e nisë punën me këtë çështje kur të ngrihet sepse mendoj se është prioritare”, theksoi avokati i Shoqatës së Bashkive.
Daci shpjegoi rastet e Durrësit dhe Vorës, ku gjykatat nuk kanë certifikuar fillisht mandatet e dy kryebashkiakëve.
“Gjykata verifikon kushtet sipas nenit 45 të Kushtetutës dhe Kodit Zgjedhor. Ky nen është e drejta për t’u zgjedhur dhe për të zgjedhur, por ne nuk kemi një praktikë për ta kuptuar se çfarë do të thotë neni 45.
Madje edhe doktrina shqiptare është shumë e varfër, por Gjykata Evropiane e të Drejtave të Njeriut ka rreth 1000 vendime, prej të cilave ne kemi përdorur 10 te ankesa jonë, ku sqarohet se çfarë do të thotë të votosh. Nuk quhen zgjedhje nëse nuk janë pluraliste pasi kjo cenon të drejtën e zgjedhësve”, theksoi ai.
Kur u pyet pse kjo gjë ka ndodhur vetëm me Durrësin dhe Vorën, avokati tha: “mendoj se kanë qenë gjyqtarët më të guximshëm, ndërsa të tjerët kanë qenë të trembur për impaktin ose nuk e dinë se çfarë duhet të bëjnë si gjyqtar”.
