Kryetari i Partisë Demokratike Lulzim Basha ka reaguar pas aktit të Ramush Haranidanjt. Ky i fundit dha dorëheqjen nga posti i kryeministrit të Kosovës, pasi njoftoi se është thirrur nga Gjykata Speciale e Hagës.
Haranidaj ka thënë se ka pranuar një ftesë nga dhomat e specializuara të Gjykatës Speciale si i dyshuar dhe i është ofruar mundësia që të shkojë si i pari i Qeverisë apo si qytetar i zakonshëm i Kosovës. “Nuk mendoj se duhet me ia bë këtë Kosovës. Me shku si kryeministër atje. Dhe nuk ja bëj”, u shpreh Haradinaj, i cili gjatë luftës për çlirimin e Kosovës ka qenë komandant i Ushtrisë Çlirimtare të Kosovës.
Në një reagim në rrjetet sociale, Basha shprehet se “askush dhe asgjë nuk e përdhos dot luftën çlirimtare të Kosovës dhe sakrificën sublime të familjes Haradinaj në altarin e lirisë”.
“Dorëheqja e kryeministrit Ramush Haradinaj është akti i një njeriu që ve Atdheun mbi gjithçka. Ramushi i ka shërbyer gjithmonë me vetëmohim Kosovës, në ditë të mira dhe në ditë të këqija. Ramush Haradinaj është Kosova – Kosova e lirë, Kosova e pavarur, Kosova europiane.
Askush dhe asgjë nuk e përdhos dot luftën çlirimtare të Kosovës dhe sakrificën sublime të familjes Haradinaj në altarin e lirisë!”-, është postimi i Bashës në Twitter.
