Përpara votimeve të 30 qershorit, kryeministri Edi Rama deklaronte se ata që do të pengonin zgjedhjet do të penalizoheshin duke mos u lejuar që të udhëtonin drejt BE dhe SHBA, pasi të kishin shlyer dënimin në Shqipëri.
Madje për t’u dukur sa më serioz, Rama këtë deklaratë e përktheu në një amendament të veccantë në kuadër të ndryshimeve në Kodin Penal, që ashpërson dënimet ndaj dhunuesve të zyrtarëve dhe institucioneve.
Por sot, Taulant Balla deklaroi tërheqjen e mazhorancës nga amendamenti që penalizonte dhunuesit apo penguesit e zgjedhjeve në udhëtimet drejt BE dhe SHBA.
“Në respekt edhe me deputetët e opzoitës, kemi menduar që ky amendament të mos diskutohet sot. Se ndoshta nuk është vetëm burgu që i bën njerëzit të thërrasin mendjen.
Ky do të tërhiqet, kemi ligje të tjera që kanë rregulluar këtë politike, sepse dhunën zgjedhore nuk e bëjnë njerëzit e thjeshtë e bëjnë politikanë të dështuar, e për ata politikanë të dështuar ne kemi ligjin për dekriminalizimin. Kush dënohet për krim zgjedhor, nuk kandidohet më, kush bën krime elektorale nuk mund të jetë më i zgjedhur nga populli.
Sot pas një konsultimi shumë produktiv me ju kemi arritur në këtë pikë. Shtatori po vjen, sic na takon të mbajmë fjalë hapëse, na pret një punë shumë intensive për ndryshime në kodin zgjedhor.
Nuk është sistemi zgjedhor problemi, kemi një sistem të mirë, por na duket një kod që mos të kemi më problematika që kemi hasur gjithë këto vite”, tha Balla.
