Ursula von der Leyen u zgjodh kryetare e Komisionit Evropian, duke u bërë e para grua që merr këtë post.
Votimi – Deputetët votuan me votim të fshehtë. Pasuesja e Jean-Claude Juncker, fryt i një kompromisi të pranuar nga Franca dhe të mbështetur nga 28 vendet anëtare të BE-së, u zgjodh me 383 vota (nga 733 votues), ndërsa shumica e kërkuar ishte 374 vota. 9 vota më shumë se pragu. Kishte 327 vota kundër. Njoftimi u bë nga presidenti i Parlamentit Europian, David Sassoli.
Qasja me Shqipërinë – Ursula von der Leyen u përball me Parlamentit Europian këtë të martë para votimit. Ajo i ka dhënë përgjigje pozitive një prej kërkesave të grupit S&D, për hapjen e negociatave të Shqipërisë dhe Maqedonisë së Veriut për anëtarësim në Bashkimin Evropian. Sipas televizionit maqedonas ‘Telma’, Von der Leyen është shprehur se si kryetare e Komisionit Evropian do të mbështesë hapjen e negociatave për dy shtetet ballkanike.
Kush është Ursula von der Leyen – Ursula von der Leyen lindi në tetor të 1958-ës në afërsi të Brukselit, që konsiderohet kryeqendër e Unionit Europian, por mban nënshtetësinë gjermane. Ajo frekuentoi shkollën europiane në kryeqytetin belg, ku mësoi dhe gjuhën frënge. Më pas u regjistrua në fakultetin e Arkeologjisë në Hanover dhe vetëm pas një viti kaloi në universitetin Munster për të studiuar ekonomi. Ursula ka ndjekur dhe një sërë studimesh të tjera, gjatë të cilave njohu dhe bashkëshortin, Heyko von der Leyen. Çifti ka 7 fëmijë, dhe nga vitin 1992 deri në 1996 kanë jetuar në Shtetet e Bashkuara.
Karrierën politike e nisi në vitin 2001, me një detyrë zyrtare në rajonin e Hannoverit. Dy vite më pas u zgjodh deputete dhe u ngarkua me postin e Ministres së Punëve Sociale. Në 2005 drejtoi Ministrinë e Familjes me vendim të kancelares Angela Merkel. 4 vite më pas kaloi tek Ministria e Punës dhe Punëve Sociale dhe në 2013-ën u bë gruaja e parë në drejtim të Ministrisë së Mbrojtjes.
Ursula është ministrja e vetme që ka qenë e pranishme në të gjitha ekzekutivet e Merkel nga viti 2005 deri në 2019-ën. Ideja e saj për BE-në është shumë e thjeshtë: mbështet zgjerimin, politikat pro mjedisit dhe emigracionit, por edhe sigurinë. Gjithashtu kundërshton largimin pa ujdi të Britanisë nga Unioni pasi e konsideron skenarin më të keq të mundshëm.
/Boldnews.al/
