Një arsenal i tërë luftarak është sekuestruar nga policia italiane gjatë një operacioni kundër terrorizmit që u realizua në disa qytete në veri të vendit.
Pistoleta, pushkë automatike dhe madje edhe raketa ajrore plotësisht funksionale të përdorura nga forcat e armatosura të Katarit, u sekuestruan gjatë aksionit.
Operacioni u koordinua nga zyra e prokurorit të Torinos, në bashkëpunim me Digos të Milanos, Varese, Pavia, Novara dhe Forlì. Hetimi filloi pas një vëzhgimi të disa mercenarëve italianë me ideologji ekstremiste që luftuan në të kaluarën në konfliktin e armatosur në rajonin Donbass të Ukrainës.
Si lindi hetimi
Hetimi filloi pas vëzhgimit të dy të rinjve pranë grupeve “Forza Nuova” dhe “CasaPound” që shkruanin shkrime me lëvdata ndaj nazizmit në La Spezia. Nëpërmjet kontakteve dhe degëzimeve progresive, hetuesit arritën të identifikonin mercenarët neofashistë.
Operacioni vjen vetëm disa ditë pas dënimet në gjykatë për mercenarët që kanë marrë pjesë në luftën e Donbas. Drejtësia italiane dënoi me 1 vit e katër muaj, Vladimir Vrbitchi, punëtor moldav, me dy vite e tetë muaj u dënua Olsi Krutani, ish-oficer i vetë-shpallur i forcave ajrore, pjesë e grupeve militare ruse në Ukrainën Lindore dhe italiani, Antonio Cataldo, i cili u dënua me dy vjet e 8 muaj.
Hetimet nisën në vitin 2013 në zonën e Ligurias. Tre të dënuari akuzohen për komplot për të rekrutuar dhe financuar mercenarë luftarakë. Përveç tyre, 15 persona të tjerë janë të dyshuar, tre prej të cilëve në kërkim evropian.
Gjykata arriti në përfundimin se tre burrat ishin mercenarë që morën 300-400 euro ($ 340-450) në muaj për të luftuar përkrah separatistëve që mbajnë pjesë të rajoneve të Luhansk dhe Donetsk të Ukrainës në 2017-18.
Cataldo, Krutani dhe Vrbitchii u arrestuan në Itali vitin e kaluar pasi hetuesit në rajonin veriperëndimor të Ligurias zbuluan një grup që rekrutonin luftëtarë për grupet separatiste në Ukrainën Lindore.
Në prill të vitit 2018, ambasada e Ukrainës në Romë tha se kishte informuar autoritetet italiane se kishte të paktën 30 italianë që luftonin kundër forcave të Kievit. Rreth 13,000 njerëz janë vrarë në Ukrainë që kur konflikti filloi në prill 2014.
