Thirrje për protestë është bërë ditën e hënë për projektligjin që rrit çmimin e naftës. Në rrjetet sociale është përhapur në formë virale thirrja që ditën e hënë, duke filluar nga mesdita e deri në orën 15:00, të gjithë drejtuesit e automjeteve të ndalen e të fikin mjetet në rrugë, rreth-rrotullime dhe kryqëzime, në shenjë proteste ndaj taksës së re të qeverisë dhe për të kërkuar uljen e çmimit të naftës.
Mes zërave që i janë bashkuar publikisht nismës është edhe ish-deputeti i PD-së, Agron Shehaj.
Megjithatë, ka dhe nga ata, që këtë formë proteste nuk e shohin si të duhurën. Një ndër ta është edhe Kreshnik Osmani, kreu i Partisë Shqiptare Atdheu. Ai shprehet se kjo formë proteste është një kurth dhe jep një tjetër sugjerim.
“Mos i ftoni njerëzit të fikin makinat sepse është një kurth nepermjet të cilit mafia politike dhe financiare e Tiranës dhe klientela e saj (qe perfiton drejtpersedrejti nga ligjet e mafies shteterore) përpiqet të shkarkojë revoltën dhe zemëratën e njerëzve me kesoj metodash. Ja u fiken makinat, po pastaj? Pasi t’i fikin makinat njerezit largohen me vetedije dhe moral te ngritur se e kryen detyren e tyre qytetare dhe jeta vazhdon, bashke me taksen. Tensioni u shkarkua dhe avazi vazhdoi”, shprehet ai.
“Njerezit duhet te ndezin motoret e mendjes dhe te shpirtit dhe te refuzojne zullumqaret e veshur me pushtet, ciletdo qofshin ato. Nese nuk mundemi t’i largojme per momentin, t’ua kthejme jeten ne ferr, qe te mos flene te qete, ashtu si e ndertojne ata çdo dite ferrin tone!”, e mbyll reagimin Osmani.
