Zgjedhjet e 30 qershorit për partitë e vogla që morën pjesë në to, kanë qenë të parregullta dhe me shumë manipulime. Kreu i Partisë, Bindja Demokratike, Astrit Patozi u fut në këto zgjedhje me disa kandidatë përballë të majtëve, por rezultati ishte tepër negative. Pasi procesi ka përfunduar dhe KQZ vazhdon të merret me miratimin e tyre, Patozi ka paditur këtë institucion në gjykatë, ku kërkon mosnjohjen e rezultatit të zgjedhjeve në Kurbin.
Kërkesë padia mban firmën e Edmond Pirolit, kandidatit për kryetar bashkie në Kurbin. Ai kërkon shpalljen të pavlefshme të zgjedhjeve të 30 qershorit në 76 qendrat e votimit të KZAZ-së numër 15 për Bashkinë e Kurbinit si dhe përsëritjen e zgjedhjeve.
Ky vendim i Bindjes Demokratike vjen pasi Komisioni Qendror i Zgjedhjeve nuk pranoi ankimimet e kësaj force politike, e cila kërkoi të hapeshin kutitë në disa bashki me pretendimet se kanë rezultuar votues edhe persona që nuk kanë qenë fare në Shqipëri. Bindja, përmes përfaqësuesit të saj Fabion Topollaj kërkoi të verifikohen të dhënat përmes sistemit TIMS, por përfaqësues të mazhorancës në KQZ thanë se pa pasur prova konkrete për këto akuza, nuk mund të hapen të gjitha kutitë.
