Gjykata e Elbasanit ka konfirmuar mandatin e fituar nga kandidati i PS për Bashkinë e Elbasanit Gledjan Llatja, në votimet e 30 qershorit. Gjyqtarja Pajtime Fetahu ka konfirmuar mandatin e Llatjas me vendimin marrë ditën e sotme, pas kërkesës së dorëzuar nga vetë Llatja në gjykatë, për vërtetimin e mandatit.
Vendimi
Më këtë precedent që vendosi gjykata e Elbasanit, edhe gjykatat e tjera në vend duket se po shkojnë drejt njohjes së kryebashkiakëve të dalë nga votimet e 30 qershorit, pavarësisht dekretit të Presidentit Ilir Meta, që ka rrëzuar 30 qershorin si datë të ligjshme për zhvillimin e zgjedhjeve lokale.
“Kërkuesi Gledian Llataja ka kandiduar për kryetar i Bashkisë Elbasan, Qarku Elbasan, i mbështetur nga subjekti zgjedhor ‘Aleacna për Shqipëri Europiane; në zgjedhjet vendore të datës 30.6.2019. Në bazë të vendimit NR.939 datë 04.7.2019 të Komisionit Qendror Të Zgjedhjeve ‘Për nxjerrjen e rezultatit të votimit për zgjedhjen e Kryetarit të Bashkisë Elbsan, në zgjedhjet vendore të datës 30.6.2016’, kërkuesi është shpallur fitues në bazë të rezultatit të zgjedhjeve të miratuar me Tabelën Përmbledhëse të rezultatit të zgjedhjeve për zgjedhjen e Kryetarit të Bashkisë Elbasan. Gjithashtu konfirmohet edhe fakti se pranë KQZ, nuk është depozituar kërkesë ankimore ndaj vendimit Nr. 939 datë 04.7.2019 të Komisionit Qendror Të Zgjedhjeve, për miratimin e Tabelës Përmbledhëse të Rezultatit për zgjedhjen e Kryetarit të Bashkisë Elbasan dhe shpalljen fitues të Z.Gentian Llatja, fakt që provohet me vërtetimin e lëshuar nga KQZ Nr.13443 prot. Datë 10307.2019, administruar në seancë gjyqësore dhe ndodhur në fashikullin gjyqësor. Në këto rrethana, meqenëse nuk ka pengesa ligjore dhe është në përputhje të plotë me nenin 45 të Kushtetutës së R.Shqipërisë dhe kriteret e përcaktuara në dispozitat e Kodit Zgjedhor, gjykata çmon se duhet vërtetuar mandati i kërkuesit Gledian Llataj si Kryetar i Bashkisë Elbasan”, arsyetohet në vendimin e gjyqtares Pajtime Vetahu.
“Votimet të jashtëligjshme”
Nga opozita, votimet e 30 qershorit cilësohen të paligjshme. Një ditë më parë, nga selia e PD-së, Sekretari i Përgjithshëm Gazmend Bardhi u bëri apel gjykatave të mos u njohin mandatet fituesve të dalë nga procesi i votimit të 30 qershorit. Sot, kryetari i PD-së Lulzim Basha, pasi ripërsëriti se “votimet e 30 qershorit janë të paligjshme”, u shpreh se kryebashkiakët e opozitës duhet të qëndrojnë në detyrë.
Edhe Presidenti Ilir Meta i ka cilësuar të paligjshme votimet e 30 qershorit. Kreu i shtetit ka dekretuar 13 tetorin si datë për zhvillimin e zgjedhjeve lokale. Në këtë datë, ai ka bërë apel që të zhvillohen edhe zgjedhjet e parakohshme parlamentare dhe ato presidenciale. /BN/
