Shoqata e Gjyqtarëve hesht për kolapsin në Drejtësi, shqetësohet për pasaportat diplomatike

Nga Bold News

Në një kohë kur sistemi i drejtësisë është futur në kolaps, sidomos për shkak të standardeve të shumëfishta gjatë procesit të Vetingut, Shoqata e Gjyqtarëve, organizmi kryesor për mbrojtjen e interesave të komunitetit, ka ngritur zërin e protestës për…heqjen e pasaportave diplomatike.

Shoqata Kombëtare e Gjyqtarëve të Republikës së Shqipërisë ka dorëzuar në 11 Korrik një padi në Gjykatën e Apelit Administrativ, në të cilën kërkon shfuqizimin e Vendimit të Këshillit të Ministrave “Për kriteret për lëshimin e pasaportave diplomatike”.

Shoqata e Gjyqtarëve pretendon në padi se, fakti që kjo VKM shpall të pavlefshme pasaportat diplomatike aktuale të gjyqtarëve dhe e përjashton këtë kategori nga pajisja me pasaporta diplomatike, përbën cënim të statusit të gjyqtarit.

Kërkesa e Shoqatës së Gjyqtarëve mund të jetë e drejtë, gjithsesi ajo do të vendoset në përfundim të shqyrtimit gjyqësor në Apelin Administrativ.

Por kjo padi ngre pikëpyetje mbi pasivitetin e Shoqatës së Gjyqtarëve për çështje më thelbësore dhe më shqetësuese të sistemit të drejtësisë në vitet e fundit.

– Shoqata e Gjyqtarëve nuk ka dhënë asnjë koment dhe nuk ka bërë asnjë reagim, kur konstatohen hapur standardet e shumëfishta të ndjekura nga institucionet e Vetingut.

Opinioni publik ka reaguar fuqishëm në rastet kur Komisioni i Pavarur i Kualifikimit (KPK) ka shkarkuar nga detyra gjyqtarë të njohur për integritet të lartë e për profesionalizëm, ndërkohë që ka konfirmuar në detyrë disa gjyqtarë, për të cilët ka të dhëna të shumta për përfshirje në korrupsion.

Ndërkohë që Shoqata e Gjyqtarëve ka mbajtur një qëndrim, më së paku pasiv, ndaj këtyre rasteve, duke krijuar përshtypjen e një sjelljeje të natyrë së “kompromisit” me qeverinë, e cila menaxhon strukturat e Vetingut nëpërmjet shumë fijeve.

LEXO EDHE  Temperaturat ekstreme godasin Shqipërinë/ Kujdes në 5 ditët e ardhshme...

– Shoqata e Gjyqtarëve nuk ka dhënë asnjë koment dhe nuk ka ngritur zërin e protestës për faktin që, për herë të parë në historinë e tij, shteti shqiptar është pa Gjykatë Kushtetuese.

Shoqata e Gjyqtarëve duket se ka pranuar në heshtje akuzat publike të kryeministrit Edi Rama dhe pasuesve të tij, të cilët justifikojnë shkatërrimin e Kushtetueses me shprehjen tërësisht të pavend, sipas të cilës “më mirë pa gjykatë, sesa me gjykatë të korruptuar” (shënim: Gjykata Kushtetuese ka qenë e vetmja në sistemin e drejtësisë, mbi të cilën nuk ka pasur dyshime për korrupsion).

– Shoqata e Gjyqtarëve nuk reagoi as për “mbylljen” e Gjykatës së Lartë dhe as për idene “absurde” të misionit të asistencës ligjore të Bashkimit Europian, Euralius, për plotësimin e vakancave në gjykatën më të lartë të vendit me “gjyqtarë të përkohshëm”.

Shoqata e Gjyqtarëve nuk ka asnjë qëndrim të sajin as për faktin që Këshilli i Lartë Gjyqësor po synon të bëjë “funksionale” Gjykatën e Lartë, duke nisur procedurat vetëm për përzgjedhjen e 4 anëtarëve jo-magjistratë të saj.

Kushtetuta parashikon që Gjykata e Lartë përbëhet nga 19 anëtarë, 15 prej të cilëve gjyqtarë dhe 4 jo-gjyqtarë që vijnë nga radhët e juristëve të spikatur.

Këshilli i Lartë Gjyqësor ka vendosur, nëpërmjet një procedure të pjesshme, për të hapur fillimisht garën gjysmake, vetëm për përzgjedhjen e anëtarëve jo-magjistratë të Gjykatës së Lartë.

Edhe kjo sjellje, e cila lë shijen e denigrinit të gjyqtarëve, duket se nuk e shqetëson Shoqatën Kombëtare të Gjyqtarëve të Republikës së Shqipërisë.

Për këtë organizëm duket se mbrojtja efektive e statusit të gjyqtarëve është ngritja e zërit dhe reagimi me padi për…pasaportat diplomatike.