Është përballur sërish deputeti i opozitës së re Lefter Maliqi me kundërshtarët e tij politikë. Kështu ai nuk ka lënë rradhë ti shpëtojë edhe fakti se moderatorja Eni Vasili ëshë shpërblyer tanimë me një post në Kryeministri. Këtë fakt e ka theksuar dhe e ka vënë në dukje edhe gjatë emisionit duke e ironizuar live gazetaren.
“Më keni vënë këtu, por besoj se ka ardhur koha që të isha aty në studio”, tha deputeti që hyri në parlament nga lista e PD-së. Gazetarja Eni Vasili e pyeti Maliqin se a do ta mbajë premtimin se do të jepte dorëheqjen nëse zhvilloheshin zgjedhjet e 30 qershorit.
Deputeti tha se nuk largohet pasi ishte dekreti Metës për anulimin e zgjedhjeve që e shmangu konfliktin civil dhe jo vendimi i mazhorancës. Maliqit nuk i ka pëlqyer këmbëngulja e drejtueses së emisionit duke i thënë asaj se “po e provokonte”.
Por në fund të emisionit gjakrat janë ndezur sërish. Drejtuesja e emisionit e futi sërish në linjë Maliqin i cili i tha se ajo po e drejtonte keq emisionin duke i kujtuar një detyrë që ajo ka marrë së fundmi në administratë.
“Ti po e drejton keq emisionin. Ta gëzosh detyrën që të ka dhënë Edi Rama” – tha Maliqi, ndërsa Vasili iu përgjigj: “Po na jep dhe mend tani. Hajd mirupafshim!” – tha gazetarja duke e mbyllur lidhjen direkte me deputetin.
Gazetarja Eni Vasili është zgjedhur së fundmi nga parlamenti me propozim të qeverisë si anëtare e Këshillit të Statistikave si përfaqësuese e medias.
