Nga Ilir Kalemaj
Partia Demokratike si partia kryesore opozitare i duhet të drejtojë jo vetëm kontestimin e sistemit aktual por edhe ofrimin e një alternative bindëse. Një alternativë sa të suksesshme elektoralisht, aq edhe funksionale në drejtim të zhvillimit të vendit në pikëpamje të një strategjie afat-mesme. Sa më të qarta prioritetet dhe objektivat, aq më i sigurtë që ky vizion do të dijë si të përcillet dhe të maksimizojë rezultatin. Shqiptarët ndjehen të pashpresë nga keq-qeverisja aktuale që bashkëbisedimin me popullin-abstrakt e ka kthyer në një lajtmotiv banal por që në fakt është kthyer në një bunker ku shurdhëria dhe miopia politike dominojnë, por duan të dëgjojnë jo vetëm parrulla dhe sllogane nga pala tjetër, por edhe ide, program dhe alternativë se si dilet nga gjendja aktuale.
Parë në këtë optikë, PD duhet të eksplorojë shtigje të reja elektorale përmes një aleance vlerash. Partia Demokratike ka nevojë të kërkojë elektorat përmes aleancave në terren, duke krijuar një lidhje telash me grupet e interesit. Rigjallërimi dhe forcimi i lidhjeve me grupet tradicionale të djathta për shkak të origjinës, shtresës apo përkatësisë ideologjike duhen alternuar me çeljen e shtigjeve të reja dhe përthithjen e elektoratit gri, duke tërhequr të pavendosurit dhe përmisuar ofertën politike për ta bërë më tërheqëse dhe më bindëse për pjesën e lëkundur apo zhgënjyer me qeverisjen aktuale.
Kjo lidhje telash me njerëzit e zakonshëm dhe elitën bëhet nëpërmjet ndryshimit të rrethanave të përfaqësimit politik në opozitë. Pra rilidhje telash jo vetëm me grup votuesin tradicional si ish të përndjekurit politikë, pronarët, çamët nacionalistë e tregtarë, por edhe me gjeneratat e reja të pas 90, që sot janë 27 vjeçarë dhe votojnë prej së paku 10 vitesh. Shoqëria është një kontratë mes gjeneratash. Një lidhje telash me ata që jetojnë, me ata që jetuan dhe me ata që do të jetojnë.
Lidhje organike me bastione të së djathtës ku përfaqësimi ka pasur gjithnjë një peshë specifike me aleancë me grupe potenciale votuesish të djashtë, të tilla si:
- Sipërmarrësit e vegjël që bëjnë rreth 40 përqind të tregut të punës të të vetpunësuarëve jashtë sektorit bujqësor.
- Profesionistët e lirë që çdo ditë shkojnë në punë, ngrenë qepenat, duke e nisur ditën me minus, për shkak të mungesës së hapësirave dhe taksës së korrupsionit.
- Intelektualët (ku përfshihen mendimtarë, shkrimtarë, analistë politikë, njerëz që krijojnë valencë publike)
- Pedagogët e Universiteteve dhe studentët- Partia që lindi si parti e studentëve dhe intelektualëve duhet të shfrytëzojë gjithë kapacitetin e saj rekrutues (ideor dhe organizativ) për t’i thithur këto flukse brenda saj.
- Fermerët- Nëpërmjet skemave nxitëse të bujqësisë dhe ofrimin e kapitalit investues.
Në Ditët e Hapura të PD duhet të ketë në tavolinë përfaqësues të grupeve potenciale. Pas lidhjes së telave duhet të kalojë energjia e ndryshimit, shpjegimi i ofertës politike.
Aleanca e vlerave duhet të mbështesë parime klasike të së Djathtës së Re të tilla si “shtetin minimal”, konservatorizëm fiskal që nis me disiplinimin e financave publike, ofertën monetare (e parasë) [money supply economics] për kontrollin e inflacionit dhe derregullimin nëpërmjet privatizimit të aseteve toksike shtetërore, reduktimit të burokracive dhe lehtësive për biznesin. Pra një lëvizje që të bashkojë konservatorët sociale dhe fiskalë te liberalët e tregtisë së lirë me thelb konkueshmërinë dhe fleksibilitetin e tregut të punës. PD të mbështetet tek principet e lirive dhe të drejtave të patjetërsueshme të individit dhe dinjitetit të paprekshëm të tij.
*Shkruar enkas për Boldnews.al
