Nga Boldnews.al
Mjafton një bisedë e përgjuar nën rrëfim çiltërsie të Zoran Zaev, me dy komedianë rus, që u paraqitën si Presidenti i Ukrainës, Petro Poroshenko dhe tjetri si shefi i NATO-s, Jens Stoltenberg, për të kuptuar se pas konceptit të shituar të “korrigjimit të kufijve” Kosovë-Serbi, fshiheshin interesat e mirëfillta serbe dhe ruse.
Atë që presidenti Hashim Thaçi e paraqiti si një ide të tij dhe me mbështetjen e kryeministrit Edi Rama, nuk mund ta kalojnë aq lehtë sot. Qëllimi ishte që Kosova të merrte një pjesë të Luginës së Preshevës dhe Serbia të aneksonte jo pak por dhjetë komuna nga Veriu i Mitrovicës. Një ide e qartë ruso-serbe, që synonte të nxiste edhe një tjetër konflikt të madh në ballkan, por u rrëzua që në gjenezë me ndërhyrjen e fortë të kancelares gjermane Angela Merkel.
Në këtë qëllim dukshëm ogurzi për nga pasojat, edhe për shqiptarët në të gjithë ballkanin, kryeministri ynë kishte një tjetër ide, duke e mbështetur indirekt këtë projekt, për një synim sipas tij edhe më afatgjatë, që do i sillte “begatinë” vendit…
“Të shohim të ardhmen në mënyrë të qartë. Sot duhet të ndajmë shapin nga sheqeri. Për mua asgjë nuk duhet përjashtuar dhe gjithçka duhet parë me sytë e të ardhmes dhe me një sy të vetëm: Shqiptarët nuk duhet jenë të ndarë. Ata duhen të bashkohen si një komb me dy shtete që dëshirojnë të jetojnë pa kufij mes njëri- tjetrit. Hashim Thaçi është presidenti i Kosovës dhe komandanti i Ushtrisë së Kosovës. Kush thotë se Thaçi është tradhtar është një gomar”– tha Rama, duke dalë në mbrojtje jo të Thaçit si individ, por si “ideator” të konceptit të “korrigjimit të kufijve” Kosovë-Serbi.
Sot është koha jo për të gjetur tradhtarët, por gomerët në politikë, që duket se po konkurrojnë denjësisht si në Kosovë ashtu edhe në Shqipëri. Nën rreshta, Rama e pranon këtë ide të “korrigjimit të kufijve”, me pretendimin se në të ardhmen jo shumë të largët do sillte bashkimin mes dy shtetesh Kosovë dhe Shqipëri.
Elaburuesi më i zjarrtë i korrigjimit të kufijve në mënyrë publike dhe mediatike ishte Baton Haxhiu, që shihet edhe si “eminenca gri” e kryeministrit shqiptar dhe presidentit të Kosvës. Ai u investua fort që “korrigjimi i kufijve” duhet të ndodhte, madje në krye të diplomacisë shqiptare vendosi “kanakarin” e tij, Gent Cakaj, një 28-vjeçar me “ekspriencë” 14 vite në politikë…!
Plani do ishte i qartë: Rama, Thaçi, Cakaj, si tre shtylla në politikës në Kosovë dhe Shqipëri, do të fillonin një fazë të re diplomatike dhe në botën e errët për tëkthyer në realitet korrigjimin e kufijve, një marrëveshje Kosvë-Serbi dhe më pas pse jo, Edi të ishte “presidenti i dy shteteve shqiptare”…!
“Tradhti e lartë ndaj interesave kombëtare” e ka quajtur PD, gjiths sa u zbulua pas telefonatës së kryeministrit maqedonas Zaev, për ndarjen e Kosovës. Me një deklaratë për mediat, ish-deputeti Aldo Bumçi, thekson se “Kryeministri i Maqedonisë së Veriut, Zoran Zaev pohon dhe një herë që projekti për ndarjen e Kosovës është i vërtetë, dhe ndryshe nga çfarë është përpjekur ta paraqes Edi Rama në fakt ky është një projekt serb që i shërben interesave serbe dhe ruse, dhe qarqeve të caktuara që janë të interesuara për çdo lloj skenari ogurzi duke cënuar rëndë interesat e Kosovës”.
Nuk duhet nxituar kaq shumë, fjala tradhtar është e rëndë, por sot më së paku kryeministry ynë, presidenti i Kosovës dhe bashkëpunëtorët e tyre për të vijuar idenë e “korrigjimit të kufijve”, më së paku anojnë nga epiteti gomar… Një shprehje kjo e huazuar nga kryeministri Edi Rama pak muaj më parë…!
