Nga Pano Sako
Mos e glorifikoni Tsiprasin. Nuk është soji i demokratit të kulluar. Për shpirt të vet, do të kishte vepruar njëlloj si Rama nëse do të kishte mundësinë. Do të thoshte “M’u prish puna se humba zgjedhjet për Parlamentin Europian. Mandatin për të qeverisur e kam deri në 2021. Hajde mirupafshim.”
E pamë si u soll me Varoufakisin, aty tregoi sa demokrat ishte në shpirt.
Sepse Tsiprasi është politikan dhe si gjithë politikanët e tjerë, nëse do të kishte mundësinë do ta shfrytëzonte. Por aty është sistemi që nuk e lë të bëjë filma.
Syriza humbi. Deputetët u mblodhën dhe ia thanë Tsiprasit në sy “Na vjen keq, po duhet të dorëhiqesh. Populli foli dhe nuk na do më. S’ka rëndësi pse nuk na do – a s’na do prej marrveshjes me Maqedoninë, a s’na do prej ekonomisë, kjo s’ka rëndësi. Populli foli. Dhe ne duhet ta dëgjojmë. Sepse populli që na ka në dorë mandatin, nuk do të na e falë nëse nuk e bëjmë.” Dhe kështu nisi e mbaroi e gjitha.
Deputetët e kanë frikë popullin, sepse është populli i zgjedh ata, jo Tsiprasi.
Ky është çelësi që vuri gjithë ingranazhin në lëvizje.
Dhe natyrisht, në një sistem, ku çelësi është vota në dorën e popullit, çdo gjë funksionon si një orë zviceriane.
Tsiprasi shpall zgjedhjet se s’ka çfarë të bëjë tjetër. Populli e rrëzon dhe ai as përpiqet fare të bëjë lojra. Sapo dalin exit-pollet pranon humbjen, s’ka pse (më saktë dhe të dojë s’mundet) t’i bëjë presione KQZ-së aty. KQZ e relaksuar shpall rezultatet në kohë reale, se s’ka as presione asgjë. Të nesërmen betohet Kryeministri i ri, se s’ka ça të presë.
Të pasnesërmen jeta vazhdon normalisht.
Dhe e gjitha kjo, jo sepse Tsiprasi ishte burrë i mirë apo i keq, apo se Micotaqisi është burrë i mirë apo i keq. Ata qofshin si të jetë, janë për gratë e tyre. Aty është sistemi që komandon lojën, jo njeriu. S’ka rëndësi kush vjen e kush ikën. Kur populli flet, kushdo qoftë, thjesht bindet!
E ndërsa shikon çfarë ndodh në Greqi, kthen kokën nga vendi yt. Aty shikon Ramën dhe natyrshëm të lind pyetja: “Ore pse i ka bërë këto pantallonat synet ky, se s’po e marr vesh?”…
