Presidenti Ilir Meta ka përshëndetur protestën e një grupi shqiptaresh para Shtëpisë së Bardhë në Uashington, kundër kryeministrit Edi Rama dhe manjatit Xhorxh Soros.
“Mirënjohje të gjithë shqiptarëve të mbledhur dje në Uashington DC para Shtëpisë së Bardhë, të cilët lanë punët e tyre dhe i bashkoi shqetësimi për të ardhmen e Shqipërisë, duke konfirmuar aleancën e pathyeshme të kombit tonë me Shtetet e Bashkuara të Amerikës. Përkrahja e tyre më shumëfishoi forcat, ndaj si President i Republikës kam besim tek komuniteti i ndershëm shqiptaro-amerikan, për të mbrojtur dhe forcuar së bashku këtë aleancë strategjike! Shqiptarët qëndrojnë të fortë dhe të vendosur, jo për të marrë një vizë amerikane, por për të mbrojtur idealet amerikane të lirisë dhe dinjitetit njerëzor, që janë jo vetëm idealet e SHBA, por edhe të qytetërimit botëror ku ne bëjmë pjesë. Shqipëria nuk do të kthehet kurrë më në ‘one-party state’! Ne jemi anëtarë të NATO-s dhe në zemër të kësaj Aleance është DEMOKRACIA! Zoti e bekoftë Shqipërinë! God bless America! God bless Albanian-American friendship!”-, shkruan Meta në një postim në Facebook.
Kreu i shtetit shpërndan edhe një fotografi nga protesta, ku duket të rinj me pankarta, ku shkruhen mesazhe si “George Soror, një destabilizues i Shqipërisë, një vendi të NATO-S”, apo “Donald Trump – Të lutëm shpëto Shqipërinë nga Shoqëria e Hapur e korruptuar e George Sors dhe njeriut të tij në Shqipëri, Edi Rama”.
Meta-Rama-Soros
Pak ditë më parë, Meta sulmoi edhe reformën në drejtësi, që është një nga pikat të cilës kryeministri Edi Rama i mëshon më fort kur flet për arritje. Meta e quajti “Ramaformë”.
Në një deklaratë për mediat nga selia e Presidencës, kreu i shtetit shigjetoi edhe manjatin Xhorxh Soros, me të cilin kryeministri Edi Rama është përfolur se ka lidhje të forta.
“Kam edhe dy fjalë për George Soros. Nuk e kam dëgjuar me vëmendje Viktor Orbanin kur më tha të keni kujdes sepse nuk është aq demokrat sa duket. George Sorosit i uroj jetë të gjatë dhe i uroj suksese, t’i gëzojë ato miliardat e veta. Ilir Meta nuk është i racës së Gruveskit dhe do i dalë për zot Shqipërisë. Jam i racës së Avni Rustemit dhe Mic Sokolit”, u shpreh Meta. Ai theksoi se nuk është i vetëm në mbrojtjen e vendit përballë “atyre miliarderëve që duan ta kthejnë Shqipërinë në parajsë të pastrimit të parave dhe në bazë të krimit të organizuar.” /BN/
