Kuvendi miratoi këtë të hënë raportin e komisionit të ligjeve për shkarkimin e Ilir Metës nga posti i Presidentit dhe kërkesën për ngritjen e një komisioni hetimor.
Raporti i komisionit të ligjeve, konkluzionet e të cilit i lexoi kryetari Ulsi Manja, u miratua me 102 vota pro, 7 kundër dhe 2 abstenim.
Po ashtu, u miratua edhe ngritja e komisionit hetimor me 101 pro 6 kundër, 3 abstenim, ndërsa 1 deputet nuk votoi.
Kryetari i këtij komisioni do të jetë Ulsi Manja, ndërsa Vasilika Hysi, Klotilda Ferhati, Bashkim Fino dhe Alket Hyseni, do të jenë anëtarë.
Duke ftuar deputetët të votojnë ngritjen e komisionit, gjatë fjalës në seancën parlamentare, Rama tha: “Me ligj (Meta) mund të shkarkohet vetëm pasi komisioni hetimor parlamentar që votojmë sot të kryeje detyrimin kushtetues të hetimit të fakteve, dëgjimit të dëshmive përkatëse dhe raportimit përpara kuvendit të përfundimeve të hetimit mbi shkeljen e rëndë të kushtetutës”.
Sipas Kushtetutës, fjalën e fundit për shkarkimin e Presidentit e thotë Gjykata Kushtetuese, aktualisht jo ekzistente.
