Pasi ka punuar konkretisht me mbrojtjen, reparti që ka shfaqur probleme në fazën përgatitore në Slloveni, si dhe pas çmontimit të kundërshtarit para ekipit, dje trajneri Franko Lerda theksin ia ka vënë perfeksionimit të disa skemave taktike, kryesisht nga goditjet standarde.
Por, në kampin e kuq i druhen frikës së spiunazhit apo pasqyrimit të përgatitjeve në internet nga ku mund të përfitojë kundërshtari. Me këtë frikë përbrenda, dje trajneri Lerda dha urdhër që edhe ata pak tifozë dhe përfaqësues mediash të pranishëm në stadiumin e Kamzës të dilnin jashtë. “Na vjen keq, por duhet të dilni jashtë! Trajneri ka vendosur që seanca të jetë më dyer të mbyllura, pasi ka planifikuar një seancë speciale të karakterit taktik”. Ky ishte mesazhi i përcjellë nga drejtuesi i klubit për të pranishmit e pakët në stadium. Por, duke dituar infrastrukturën e terreneve stërvitore dhe stadiumeve në Shqipëri, jo Franko Lerda, por asnjë trajner nuk e ka luksin të punojnë në privatësinë e tij.
STËRVITJE NË PIKUN E VAPËS
Partizani ka zhvilluar dje një seancë stërvitore në terren dhe ajo u mbajt në stadiumin e Kamzës. Seanca ka nisur në orën 10:15 dhe ka përfunduar në orën 11:30. Orari nuk ka qenë i goditur, pasi 30- minutëshi i fundit u zhvillua në pik të vapës, ku termometri regjistronte shifrën 35 gradë. Mbase kjo është edhe një strategji e stafit, që lojtarët të fitojnë imunitet me vapën, në mënyrë që të shmanget justifikimi se ndaj Karabakut po luajmë në një orar jo të favorshëm dhe në temperatura të larta. Gjithsesi, pozitiv është fakti se të gjithë lojtarët e përballuan me sukses “pjekjen” në diell.
