Një tjetër futbollist që mund të rikthehet nga huazimi pas një aventure 2-vjeçare në Maqedoninë e Veriut është edhe Serxhinjo apo ndryshe Serxhio Antonio Da Luiz Xhunior.
Brazilianit i mbaroi huazimi fillimisht tek Rabotniçki dhe më pas tek Shkupi. Në dy sezonet e luajtura në kampionatin maqedonas, Serxhio Zhunior ka mundur të koleksionojë 55 paraqitje në kampionat, duke shënuar 11 gola dhe duke dhënë 16 asiste.
Këto shifra kanë bindur Skënderbeun që të provojë edhe një herë të mbajë në ekip brazilianin, të paktën gjatë fazës përgatitore. Kjo do të jetë përcaktuese nëse do të qëndrojë në Korçë apo do të mbyllë përfundimisht aventurën me bardhekuqtë, duke qenë se është drejt skadencës së kontratës. Skënderbeu e pikasi brazilianin tri vite më parë, kur ishte pjesë e Hajvalisë në kampionatin kosovar.
Ndërkohë, një shans mendohet se do t’i jepet edhe sulmuesit tjetër, i cili ishte në huazim te Rabotniçki, Xhefri Çarls. Ky i fundit luajti dy sezone të plota në Maqedoninë e Veriut, duke arritur të shënojë 12 gola në 58 ndeshje, nga të cilat luajti vetëm 25 si titullar.
/PANORAMASPORT.AL
