Ish-ministri i Drejtësisë, Ylli Manjani, ka reaguar përmes postimeve në rrjet mbi çështjet më të nxehta të politikës së ditëve të fundit, nismën e Rilindjes për shkarkimin e Presidentit, dhe anullimin e 30 qershorit si datë zgjedhjesh vendore me dekret Presidencial.
Manjani shkruan se për një moment le ta zemë se Presidenti e ka shkelur Kushtetutën përgjatë zbatimit të kompetencës për caktimin e datës së zgjedhjeve dhe, për këtë u dashka shkarkuar, po Parlamenti që u kap në shkelje të hapura të Kushtetutës plot 11 herë, çfarë duhet bërë me të?
“Dhe cfarë shkeljesh! Të hatashme! Flagrante!
Flasin për e në emër të Kushtetutës dhunuesit e saj. Kulmi!”, shkruan Manjani.
Ndërkohë në një tjetër postim, Manjani ndalet te Gjykata Kushtetuese, për të cilën thotë se priten shumë gjëra.
“Ndër të tjera pritet edhe anulimi i dekreteve të Presidentit për anulimin e 30 qeshorit dhe caktimin e 13 Tetorit.
Pra pritet që gjykata të anulojë diçka të kohës së shkuar.
Sipas kësaj llogjike i bie që të anulohen edhe zgjedhjet e shtyra nga Edi Rama të 2007-s dhe të 2017-s?!
Edhe ato zgjedhje ndodhën në të shkuarën dhe u çdekretuan e u dekretuan njësoj si këto kë këtij viti…
Pra kur zgjedhjet i shtyn Rama jemi në rregull me Kushtetutën, kur ja shtyjnë Ramës nuk quhen!!!
Llogjikë mrekullie, apo jo?!”, shkruan ish-ministri i Drejtësisë.
Lidhur me Komisionin Hetimor që pritet të zyrtarizohet në Kuvend ndaj Presidentit Ilir Meta, Manjani ironizon duke kujtuar se deputenjtë e dosjeve 184 dhe 339/1, do hetojnë e kërcënojnë gjithë dynjanë.
“Vetëm veten se hetojnë dot.
Kjo nuk është nga atë gjera që bëhen vetë. Duhet tua bëjnë të tjerët…
Kushtetutë, jo shaka!”, shkruan Manjani.
