Luigi Soreca, Ambasadori i BE-së në Tiranë, i cili shumë shpejt është pozicionuar në krah të Kryeministrit Edi Rama, duke vijuar pothuajse të njëjtën linjë si paraardhësja e tij, Romana Vlahutin, është shfaqur sot në krah të dy personave shumë të afërt me Kreun e Qeverisë, biznesmenin Samir Mane dhe pronarin e TV Klan, Aleksander Frangaj.
Televizioni i Frangajt, bashkë me TCH që drejtohet nga Ben Blushi, janë identifikuar në raportin e ODIHR, si dy mediat kombëtare që kanë mbajtur anën e qeverisë dhe një qëndrim neutral deri në negative ndaj opozitës, përpara votimeve të 30 qershorit.
Soreca është fotografuar sot në një kafe, pranë televizionit të Frangajt, me dy biznesmenët. Sipas portalit shqipsot, prania e Ambasadorit Soreca nuk ka pasur të bëjë me ndonjë intervistë të tij, por me një takim, me Frangajn dhe Manen.
Takimi vjen në një kohë kur situata politike në vend është e tensionuar, ndërsa diplomatit të BE-së nga Presidenti i Republikës i janë drejtuar një seri pyetjesh lidhur me atë se çfarë ka bërë Ambasadori i Delegacionit të Bashkimit Europian për të zgjidhur krizën politike në vend.
Gjatë paradites, Soreca ka shpërndarë një deklaratë ku i bënte thirrje palëve të uleshin urgjentisht në dialog, ndërsa kërkonte gjithashtu hetimin e krimeve zgjedhore. Po kështu Soreca jepte mesazhin për reformën në drejtësi, të cilën e quante të pakthyeshme, ndërsa një ditë më parë Presidenti Meta e cilësoi si një Ramaforme.
Nuk dihet se çfarë mund të ketë biseduar Ambasadori i BE-së në Tiranë me dy biznesmenët, njëri prej të cilëve pronar i një prej televizioneve kombëtare, por ajo që dihet është se ata kanë raporte shumë të afërta me kryeministrin.
Po kështu vetë Soreca ka raporte mjaft të afërta me Ramën, çka është provuar edhe nga sms e publikuara pak javë më parë në media, ku shfaqet komunikimi mes tyre.
Atëherë çfarë mesazhi ka dashur të përcjellë Soreca dhe kujt?
