Presidenti i Republikës, Ilir Meta, një ditë më parë në një konferencë për mediat, akuzoi deputetin socialist Ulsi Manja, se ishte shprehur se “do t’a piqte në furrë” Kreun e Shtetit. Meta deklaroi se ishte i gatshëm të përballej me Ulsiun e Dibrës.
Ndërkohë sot, Konferenca e Kryetarëve e mbledhur për të diskutuar seancën e së hënës ku do të diskutohet ngritja e komisionit hetimor për shkarkimin e presidentit Ilir Meta, ka vendosur që ky komision të përbëhet nga 9 anëtarë, 5 nga PS dhe 4 nga opozita e re.
Kryetar i këtij komisioni do të jetë kreu i Komisionit të Ligjeve, Ulsi Manja. Ajo që dihet është se anëtarë të këtij komisioni nuk do të jenë ta që firmosën kërkesën për shkarkimin e presidentit.
Manja ishte një nga deputetët e përfshirë në përgjimet e publikuara nga gazeta gjermane Bild, në atë që njihet si Dosja 184, që bën fjalë për manipulimin e votave në qarkun e Dibrës.