Kryetari i KQZ-së, Klement Zguri paralajmëroi nisjen e hetimeve administratave lidhur me shifrat kontradiktore të publikuara nga KQZ për votimet e djeshme.
“Shifrat e deritanishme janë të dhëna jozyrtare dhe produkt i komunikimit me telefon nga administrata zgjedhore, të marra nga komisionerët e qendrave të votimit. Në zgjedhjet e kaluara raportimi është bërë nga qendrat e votimit në sistemin elektronik dhe të dhënat nuk janë transmetuar me telefon siç ndodhi këtë vit. Tabelat përmbledhëse duhet të përmbajnë numrin e saktë të numrit të votuesve dhe fletëvotimeve të përdorura, si dhe numrin e votave për çdo kandidat. Si rregull, këto shifra duhet të korrespondojnë. Në rast se të dhënat në tabelat përmbledhëse janë kontradiktore, atëherë kjo mund të jetë tregues paaftësie në dokumentim, por edhe tregues parregullsie”, deklaroi Zguri.
“Se çfarë ka ndodhur në rastin konkret, kjo do të zbulohet me hetim administrativ”, shtoi Zguri.
Komisioni Qendror i Zgjedhjeve ka publikuar shifra kontradiktore lidhur me votimet. KQZ, në shumë bashki, nxori më shumë vota sesa votues.
Zëdhënësja e KQZ-së, në një deklaratë për mediat tha se të dhënat ishin paraprake. Ndërkohë, nga opozita u hodhën akuza për manipulim masiv të votimeve nga ana e anëtarëve socialistë të KQZ-së, për llogari të kryeministrit Edi Rama.
