Aktivisti i shoqërisë civile, Pano Soko përmes një postimi në Facebook shkruan se në votimet e djeshme shqiptarët treguan se duan një Shqipëri tjetër ndryshe nga e para, sepse e kuptojnë që ky sistemi i pushtetit në dorën e një njeriu është burimi i gjithë fatkeqësive dhe duan demokraci, ku vullneti dhe zëri të jenë të shumicës së njerëzve dhe jo të një njeriu.
Postimi i plotë:
Shqipëria 2.0
Kjo është ajo që shqiptarët folën sot. Duan një Shqipëri tjetër, ndryshe, nga e para.
E para – Nuk bën dot hajër në votime duke iu bërë presion atyre 100 mijë të punësuarve në shtet. Ramiz Alia kishte 1.8 milionë të punësuar në shtet dhe iku me vrap, jo më ti me 100 mijë.
E dyta – shqiptarët treguan që e shesin votën, vetëm atëherë kur nuk kanë kujt t’ja japin falas. Nëse asgjë nuk i frymëzon, nëse të gjithë janë njëlloj, atëherë ia shet ofertuesit të parasë. Fundja njëlloj është.
Por nëse atyre iu jepet një opsion që iu ndez shpresë dhe përçon besim se ka drejtësi, ata nuk shiten. E treguan sot me bojkotin. Mund të ishin shitur sot? -Patjetër! 500 mijë vota me 50 Euro, bëjnë vetëm 25 milionë (sa 1/10 e Milot-Balldren). Por nuk e bënë. Refuzimi sot ishte si pishtar shprese dhe ata e ndoqën, nuk u shitën.
Sot shqiptarët i dhanë një shuplakë autokracisë. Pushtetit të njëshit. Sepse e kuptojnë që ky sistemi i pushtetit në dorën e një njeriu është burimi i gjithë fatkeqësive. Jo më një person me gjithë pushtetin. Duan demokraci. Ku vullneti dhe zëri të jenë të shumicës së njerëzve dhe jo të një njeriu.
Shqiptarët treguan sot që ata refuzojnë të vazhdojnë të trajtohen si dele. Ku ti mund të marrësh gjithfarë injoranti e krimineli e tua japësh me detyrim në krye. Shqiptarët kërkojnë që në krye të kenë vlera. Njerëz të ditur që dinë çfarë bëjnë. Njerëz me integritet e personalitet që e marrin vendin nga pika A dhe e çojnë tek pika B, jo e anasjellta. Nuk do të pranojnë më që mbeturina kromozomike të diktojnë jetët e tyre.
Dhe sot ata treguan që refuzojnë në masë këtë.
Shqiptarët sot i dhanë një shuplakë të fortë gjithë sistemit. Shqiptarët duan punë. Shqiptarët duan shkolla më të mira për fëmijët. Shqiptarët duan spitale e shëndetësi më të mirë. Shqiptarët duan ujë. Duan ligj të barabartë për të gjithë. Duan gjykata. Duan rrugë. Me pak fjalë duan të marrin mbrapsht ato qe ata i paguajnë me taksat e tyre. Por që deri më sot nuk e kanë marrë. Pse? – Sepse një grusht të pangopurish në politikë dhe ekonomi marrin çdo gjë që në fakt duhet të shkonin për të gjithë. Refuzimi sot ishte posaçërisht për ta.
Shqiptarët sot janë në kërkim të një Shqipërie të re që i frymëzon dhe iu jep shpresë se mund t’ia dalin të ndërtojnë një fillim të ri, që të vazhdojnë të jetojnë në vendin e tyre me dinjitet.
Sepse shqiptarët kaq pak kërkojnë. Thjesht një vend ku të jetojnë me dinjitet.
