Nga Boldnews.al
Nuk ka më dilemë për nëpunësit e administratës. Kudo që ata në jenë, në arsim, shëndetësi, institucione të tjera, sot duhet të ulin kokën, të marrin rrugën drejt qendrave të votimit dhe bashkë me votën që do hedhin në kuti, do burgosin edhe shpirtin e lirë. Janë të detyruar të votojnë. Prej ditësh zyrtarë të lartë të administratës dhe militantë të thekur të Rilindjes kanë ushtruar presion të fortë mbi ta; me kërcënimin e pastër: Votën të dielën, ndryshe të hënën ikni nga puna.
Në QSUT janë kërkuar listat me të gjithë punonjësit që sot kanë turnet e shërbimit, një tjetër listë është për mjekë, infermierë apo punonjës tjerë të administratës të cilët kanë bërë kërkesë për të qenë anëtarë komisionesh në zgjedhje. Në mënyrë të drejtëpërdrejtë u është kërkuar që të shkojnë të votojnë, ndryshe duke nisur nga dita e hënë do të kenë probleme për atë vend pune.
Për ta nuk është vetëm një vend pune, por i ngjan një “furre buke”, ku ata ushqejnë veten dhe familjen, ndaj sot duket se më shumë se “urryer” duhen mëshiruar dhe kuptuar, pasi pushteti i preku me kafshatën e fëmijëve.
Të hënën, drejtorët e përgjegjësat nuk do i shohin vartësit në sy, por gishtin e madh të dorës së majtë, nëse është nxirë nga lapsi i zi, që bashkë me të nxin edhe “faqen” e tyre.
Por ndërsa do rendin pas kutive të votimit ata do të identifikohen si “votues të Rilindjes”, që pa dashjen e tyre, do kthehen në shtresën e “magjinalizuar” të nesërmen. Mund të quhen “komunistë”, mund tu vihet epiteti idhtarë pushteti, por për shkak të historisë që ka ofruar vendi ynë, ata të nesërmen do të jenë të paragjykuar, pavarësisht se shkuan me përdhunë apo me dëshirë drejt një procesi votimesh dhe jo zgjedhjesh.
Kjo situatë është edhe në arsim, por terrori i vërtetë që po bëhet është mbi punonjësit që janë në varësi të Bashkisë Tiranë. Atyre u kërkohet jo vetëm vota e tyre, por e familjes dhe të afërmeve dhe për këtë duhet të tregojnë provat. Prej më shumë se një muaji ata u detyruan të marrin pjesë në çdo aktivitet politik dhe miting të organizuar nga Veliaj. Pasi merrnin pjesë në takime, nisnin edhe foto se sa të pranishëm kishin sjellë. Janë krijuar grupe në whatsapp enkas për zgjedhjet ku secili jep premtime sa votues do të dërgojë drejt qendrave të votimit.
Në fund duhet të tregojnë provat me numrat përkatës të personave të afërt dhe familjarë që kanë bindur të marrë me përdhunë njerëz të “burgosur në shpirt” që kryen një gjest që ndoshta gjithë jetën nuk do ia falin vetes.
