Në votimet e sotme kanë marrë pjesë vetëm 15 % e numrit të zgjedhësve. Deklarata është bërë nga sekretari për Çështjet Zgjedhore në PD, Ivi Kaso, i cili paralajmëroi mbajtjen e përgjegjësisë për të gjithë ata që po manipulojnë shifrat.
“As mbushja e kutive dhe as falsifikimet që po ndodhin nuk e shpëtojnë, Edi Ramën nga ajo që tashmë e dinë të gjithë, shqiptarët e kanë refuzuar”, tha Kaso.
Në këtë kuadër ai paralajmëroi ata që i quajti kamikazë të Ramës të kenë kujdes pasi do të mbajnë përgjegjësi dhe do të përballen me ligjin për çdo manipulim të kryer.
Deklarata e PD
Operacioni i drejtuar nga Edi Rama për falsifikimin e pjesëmarrjes në votimet e tij njëpartiake dhe të paligjshme po vazhdon deri në fund.
KQZ-ja e paligjshme me 4 anëtarë vetëm nga PS, mashtroi shqiptarët dhe partnerët për numrin e vërtetë të atyre që kanë votuar gjatë gjithë ditës dhe deri në fund të farsës.
Nga monitorimi i të gjitha qendrave të votimit, deri në mbylljen e tyre në orën 19:00, ka rezultuar se pjesëmarrja faktike në rang vendi është 15 për qind.
Partia Demokratike paralajmëron kamikazët politikë të Komisionit Qendror të Zgjedhjeve, se ata do të mbajnë përgjegjësi për falsifikimin që kanë kryer.
Me gjithë shkeljet e panumërta të denoncuara nga media dhe qytetarët:
që nga votuesit shëtitës që votojnë disa herë,
tek blerja e votave,
tek mbushja e kutive
tek komisionet e votimit me nga 1 anëtarë,
që nga votimi në grup deri tek votimi i hapur,
tek kërcënimet dhe shantazhet e zyrtarëve dhe grupeve kriminale ndaj votuesve,
e deri tek mbushja fiktive e listave të votuesve me emrat e emigrantëve;
Edhe pse në këtë farsë ai vetë kandidon, vetë voton e vetë numëron,
Paniku i Edi Ramës nga braktisja dhe refuzimi popullor e ka shtyrë drejt manipulimit flagrant të numrit të pjesëmarrësve në këtë farsë.
As mbushja e kutive që po ndodh në këto momente, dhe as manipulimi I numrit të votuesve nuk e shpëtojnë Edi Ramën nga ajo që e dinë të gjithë tashmë.
Shqiptarët e kanë refuzuar!
