Pedagoigia dhe aktivistja Ilirjana Kuçana ishte e ftuar në studion e lajmeve të Fax Neës ku foli për situatën politke në vend pikërisht një ditë përpara zgjedhjeve vendore. Ajo konsideron situatën politike mjaft shqetësuese dhe bën apel që palët të reflektojnë dhe të ulen për të gjetur një marrëëveshje që i jep fund krizës.
Sipas saj, përplasjet mund të jenë të pashmangshme ndërkohë që theksoi se data 30 Qershor është e pavlefshme sidomos pas nxjerrjes së dekretit të ri me të cilin caktohet data 13 Tetor si dita kur duhet të zhvilohen zgjedhjet vendore.
Ajo tha se nuk është e gjitha ajo çfarë mund të ndoh ditën e votimeve por paralajmëroi se nëse do të ketë të zgjedhur të rinjë, përplasja më e madhe do të ndodh kur të tentohet rrotacioni, pra dorëzimi i detyrës nga kryebashkiakët aktualë dhe marrja e saj nga të rinjtë.
“Mendoj se Rama duhet të njoh dekretin e Presidentit dhe të shmang konfliktet civile dhe dhunën që mund të ndodh. Unë personalisht nuk mund të shkoj në votime monopartiake dhe të njëjtën gjë mendoj se duhet të bëjnë edhe qytetarët e zakonshëm pavarësisht presioneve dhe dhunës psikologjike, shantazheve të cilat kanë arritur deri tek pensionistët për ndërprerjen e trajtimit ndaj tyre”, tha Kuçana ndër të tjera.
Kuçana tha se kryebashkiakët janë në detyrë dhe kanë përgjegjësinë të mbrojnë dhe të gjenden pranë militantëve që i kanë zgjedhur. Por ajo ka edhe nnjë apel për qytetarët dhe forcat e policisë: “Për aq kohë sa zgjidhja nuk vjen as nga Policia as nga militantët, këta nuk duhet të përplasen me njëri-tjetrin. Ajo vjen nga lart dhe këtë radhë është përgjegjësi kryesore e kryeministrit për të ofruar një zgjidhje. Të japë dorëheqjen dhe të kandidojë sërish për të provuar veten se sa e duan shqiptarët”.
Aktivistja tha se i është bashkuar nismës së artistëve dhe intelektualëve në vend për të mos shkuar të dielën në votime pasi nuk ka alternativë dhe garë reale.
“Unë i jam bashkuar nismës së intelektualëve për të mos shkuar në votime. Është parimore që të kemi një alternativë për të zgjedhur por përderisa këto nuk janë zgjedhje por votime, unë nuk e konsideroj të nevojshme të marr pjesë”.
