Kryeministri Rama ka mbërritur në Vlorë, ku do mbajë edhe fushatën përmbyllëse për votimet e 30 qershorit, edhe pse data është rrëzuar nga Presidentit Ilir Meta. Ky i fundit ka dekretuar 13 tetorin si datën e zgjedhjeve lokale.
Fillimisht, kryeministri inauguroi poliklinikën e re në qytet në kushte të rrepta sigurie. Vizita e Ramës zgjati rreth 20 minuta. Më vonë gjatë ditës së sotme, pritet që kreu i qeveris të mbajë edhe takimin e fundit elektoral në Vlorë, pasi sipas kalendarit të Rilindjes, dita e nesërme është heshtje zgjedhore.
Por, a do ti shkojë Rama deri në fund votimeve si në kohën e diktaturës, apo do ketë një tërheqje nga 30 qershori?
Kreu i FRPD-së, Belind Këlliçi deklaroi të mërkurën se Rama mund të tërhiqej nga 30 qershori deri ditën e premte. “Jam shpresëplote se deri ditën e premte do të ketë reflektim, dhe do të ketë zgjidhje, që nis me çështjen e parë që është largimi i Edi Ramës”, tha ai në një emision televiziv.
Ndërsa Presidenti Meta, përmes një postimi në Facebook shprehu “besimin se Kryeministri Rama do të reflektojë deri të shtunën”.
Megjithatë, deri më tani, Rama nuk ka bërë asnjë hap pas. Gjatë deklaratave të ditës së sotme, ai është shprehur i vendosur për të shkuar në “votimet” e 30 qershorit, siç i cilësoi edhe BE.
