Ashtu si ministri i Brendshëm Sandër Lleshaj dhe deputeti Tom Doshi ka kërcënuar me arrestime pas trazirave në KZAZ në Bushat.
“Materialet zgjedhore do të zëvendësohen. U lidha me KQZ do të vijnë me avion prej Sllovenie dhe ditën e shtunë janë materialet këtu. Populli nuk do të ketë asnjë shqetësim, ata që kanë kryer këtë akt do të japin llogari para ligjit. Ky është një akt i shëmtuar. Këto gjëra ndodhin në Afganistan, jo në bashkinë e Vaut të Dejës apo në Shkodër. Për ne është pozitive që e pamë se çfarë kanë ndërmend të bëjnë. Do marrin masa që edhe kjo qendër të jetë e mbrojtur. Shkaktarët që kanë kryer këtë sulm do të mbajnë përgjegjësi penale”, tha Doshi për gazetarët.
Në Shkodër, në KZAZ numër 6 në Bushat i është vënë flaka materialeve zgjedhore. Ka pasur përplasje të protestuve me policinë dhe janë hedhur molotovë. Raportohet për 2 efektivë policie të plagosur.
Presidenti Ilir Meta shpalli sot dekretin për datën e re të zgjedhjeve lokale, 13 tetor 2019. Ndërsa kryeministri Edi Rama i qëndron datës 30 qershor si dita kur do të zhvillohen zgjedhjet lokale, pavarësisht dekretit të Metës. Ndërkohë, kreu i PD-së Lulzim Basha deklaroi se nuk ka zgjedhje pa plotësuar dy kushte: largimi i Ramës si kryeministër dhe vënia para drejtësisë e atyre që kanë vjedhur votat.
