Nga Boldnews.al
Ndërsa në Tiranë kryeministri Edi Rama mbante një takim “elektoral” për votimet e 30 qershorit në sistemin monopartiak të Rilindjes së tij, në Hungari, ish-kryeministrit i Maqedonisë Nikola Gruevski u paraqit me pranga në duar në gjykatë.
Ai u arratis nga vendi i tij pasi u dënua me dy vite burgim për abuzim me fondet publike, ku shkak u bë tenderi i supërfryrë i automjetit të blinduar që ai udhëtonte dhe gjithashtu i dyshuar për organizimin e sulmit në Kuvendin e Maqedonisë. Kaq iu desh gjykatës në vendin fqinj që të dënonte njeriun që deri para dy vitesh konsiderohej i shumëpushtetshëm, i paprekshëm, arrogant dhe personazh që e kishte shumë të lehtë të nxiste konflikt sesa të bënte paqe.
Nga ana tjetetër, në Shqipëri kryeministri Edi Rama ka ngjashmëri të madhe në mënyrën si po qeveris dhe katasrofën ku po dërgon vendin, sidomos më 30 qershor e më pas. Ai vijon të mbajë qëndrim të prerë për të zhvilluar zgjedhjet (votimet) pa pjesëmarrjen e opozitës, ndërsa në vend ka shtuar reprezaljen policore, sulmet politike ndaj kundërshtarëve dhe kërcënimin e qytetarëve protestues duke u kujtuar burgun.
Po si erdhën këta kryeministra të Ballkanit të trazuar dhe të varfër në këtë pikë? Në Maqedoni, tatëpjetën arroganti Gruevski e mori pasi i shpërthyen disa përgjime të zyrtarëve të lartë ku flisnin për afera, sulmet ndaj opozitës dhe mbi të gjitha nxitjes së urrejtjes etnike.
Përgjimet u publikuan nga opozita e asaj kohe e drejtuar nga kryeministri i sotëm Zoran Zaev. Sërish Gruenvski mbijetoi, rriti arrogancën, u bëri sfidë edhe ndërkombëtarëve, por në fund iu dorëzua verdiktit të popullit, që e shembi me votë dhe i hapi rrugë drejtësisë të bënte detyrën e saj.
Në Shqipëri, 32 audiopërgjime të publikuara nga gazeta gjermane Bild, të shkëputura nga dosjet e rënda të krimit elektoral 339 dhe 184, kanë si thelb përfshirjen e zyrtarëve të lartë që nga kryeministri, ish-ministra, deputetë, drejtues policie, zyrtarë lokal dhe elementë të rrezikshëm të botës së krimit të cilët angazhohen në shitblerjen e votave dhe kërcenimin ndaj votuesve me qëllimin e pastër për ti dhënë Rilindjes pushtetin, në Dibër gjatë zgjedhjeve lokale 2016 dhe ato të përgjithshme të vitit 2017.
Rama sërish mbijeton, madje çdo ditë kthehet edhe më i rrezikshëm, duke ndjekur identik “udhën e Gruenvskit”. Nëse drejtësia do të funksionojë, atëherë Rama ka vetëm një udhë të fundit për të kryer, nga Rinasi drejt të panjohurës, në një shtet që do i sigurojë që nuk do të ekstradohet në vendlindje. Me siguri Hungaria nuk do të jetë… Ky është i vetmi ndryshim mes Ramës dhe Gruevskit, të tjerat i kanë të përbashkëta, përgjimet, shantazhin në deforminin e votës, sulmin ndaj opozitës dhe abuzimin me fondet publike.
