Katër ditë para 30 qershorit, datë në të cilën kryeministri Edi Rama dhe Rilindja do të tentojnë të realizojnë votimet, dega e PD-së së Korçës ka dalë me një thirrje drejtuar qytetarëve për të ndaluar çmendurinë e kreut të qeverisë.
“Çmenduria e këtij kryeministri që rrjedhimisht përçohet nëpër të gjitha institucionet e shtetit, ka arritur kulmin e vet historik të këtyre 30 viteve.
Në ketë çmenduri, ai kërkon tashme të tërheqë dhe qytetarët, duke përdorur të gjitha format e mundshme për të arritur qëllimin, si joshjen nëpërmjet ryshfetit, presionin kundrejt punonjësve të administratës dhe atyre që ka në listëpagesat e shtetit, shantazhin ndaj biznesit, ndalimin me ligj për të dalë nga vendi, burgun.
Ka arritur deri aty sa të kërcënojë edhe të burgosurit, se do t’ju vështirësojë jetën nëse nuk votojnë. Nëse këto nuk janë forma te dik-taturës të para 30 viteve, le të dalë dikush dhe ta thotë. Por sigurisht që të tilla do të jenë, përderisa trashëgimtarët e komitetit qendror, kanë hyrë përsëri në zyrat e shtetit. Dhe po rikthejnë atë institucion famëkeq.
Qytetarë të Korçës! Tregojeni edhe njëherë se kush jeni. Tregojuni të çmendurve se çfarë ndodh nëse e konsideron popullin si një turmë delesh dhe kërkon ta shfrytëzosh deri në palcë. Nëse i “Kryeçmenduri” vazhdon me marrëzinë e tij, në datën 30 qershor, jepini përgjigjen që meriton.
Kësaj çmendurie duhet të gjithë ti themi ndal. Sot e përgjithmonë”, thuhet në reagimin e degës së PD-së.
