Komisioni parlamentar i Ligjeve ka miratuar me 13 vota pro ngritjen e Komisionit hetimor për Presidentin Ilir Meta, që përbën edhe nisjen e procedurave për shkarkimin e tij, referuar kërkesës së 55 deputetëve.
Socialistët dhe opozita e re në Komisionin e Ligjeve i kanë hapur rrugën procesit kundër Presidentit, pasi ky i fundit me një dekret të posaçëm anulloi zhvillimin e zgjedhjeve më 30 qershor.
Spartak Braho, anëtar i Komisionit të Ligjeve, dikur një nga njerëzit e besuar të Ilir Metës, tha se Kolegji Zgjedhor me vendimin e dhënë dy ditë më parë ka bërë nul dekretin e Presidentit.
Braho u shpreh se Presidenti me dekretin për anullimin e zgjedhjeve ka shkelur Kushtetutën. Braho tha se Kreu i Shtetit nuk ka nxjerrë një datë të re për zgjedhjet, çka sipas tij, përbën një tjetër shkelje.
Ulsi Manja, kryetar i Komisionit të Ligjeve, tha se tashmë është hapur rruga e ngritjes së një komisioni hetimor parlamentar, pasi presidenti ka shkelur kushtetutën.
Manja tha se ishte dakort me konkluzionet e Brahos, ndërsa shtoi se hetimi parlamentar do të provojë shkeljet Kushtetuese.
Një ditë më parë edhe deputetja socialiste Vasilika Hysi u shpreh se Presidenti ka shkelur Kushtetutën, por ajo e konsideroi si gafë botimin e dekretit në Fletoren Zyrtare.
