Nga Boldnews.al
“Rilindja” e ka shumë të thjeshtë për të detyruar punonjësit e administratës për t’u paraqitur në votime mono-partiake të 30 Qershorit, në tentativë për të legjitimuar zgjedhjet e kontestuara fuqishëm nga opozita dhe Presidenti i Republikës.
Kushdo nga zyrtarët e pushtetit qëndror dhe atyre pjesë të pushtetit lokal që administrohen nga Partia Socialiste, tashmë e ka marrë urdhërin e prerë për të votuar vetë dhe së bashku me familjarët që kanë mbushur moshën 18 vjeç.
Në të kundërt, “do të fluturojnë nga puna”, sipas shprehjes së përmendur nga zyrtarët e lartë socialistë në përgjimet e publikuara nga gazeta gjermane “Bild”.
Por, ka një kategori zyrtarësh publikë, të cilët janë në dilemë se si do të sillen në zgjedhjet e 30 qershorit. Ata janë gjyqtarët dhe prokurorët, të cilët, si rregull, nuk kanë dhe nuk duhet të kenë asnjë lidhje me formacionet politike.
Por, kjo funksionon vetëm në parim, pasi “Rilindja”, nëpërmjet skalioneve të saj, ka të gjithë mundësitë që të shohë se kush do t’i bindet vullnetit të saj për të zhvilluar votime një-ngjyrëshe.
Me vetingun si një formë presioni ndaj gjyqtarëve dhe prokurorëve, “Rilindja”, me shumë mundësi, do të arrijë të bindë zyrtarët e drejtësisë që të “tundin votën” e tyre në kutitë përkatëse.
Sistemi i drejtësisë në Shqipëri, deri në nisjen e procesit të Vetingut, kishte në total rreth 730 gjyqtarë e prokurorëve. Gjatë 18 muajve që po zhvillohet procesi i rivlerësimit, kanë kaluar të paktën një shkallë të Vetingut rreth 110 gjyqtarë e prokurorë, nga të cilët rreth 50% e tyre janë shkarkuar.
Statistikat dëshmojnë se shumica dërrmuese e gjyqtarëve dhe prokurorëve të Republikës presin të përballen me strukturat e Vetingut, të cilat kanë aplikuar standarte të shumëfishta dhe në interes të partisë në pushtet.
Në këtë mënyrë, gjyqtarët dhe prokurorët që ende nuk kanë zhvilluar seancat dëgjimore, pavarësisht bindjes së tyre, do të jenë të detyruar që të paraqiten në qendrat e votimit mono-partiake të dielën e ardshme.
Duke ndjekur standartin që po aplikohet për punonjësit e administratës publike, gjyqtarët dhe prokurorët që do të votojnë, do të jenë të detyruar që të nxisin edhe familjarët e tyre për të “shkundur votën”.
Nuk ka rëndësi se si do të votojnë-pro kandidatit të vetëm në pjesën më të madhe të Bashkive, apo do të djegin votën. Për “Rilindjen” ka rëndësi pjesëmarrja, pasi numërimin dhe rezultatin e ka vetë në dorë.
Ndaj, Partia Socialiste e ka shumë të nevojshme pjesëmarrjen në votim të gjyqtarëve dhe prokurorëve, për të “legjitimuar” një proces totalisht të parregullt. Nëse zyrtarët e drejtësisë nuk paraqiten të dielën në qendrat e votimit, me shumë mundësi Ulsirat, Ballat, Ermonelat, e të tjerë të ngjashëm të tyre, do të përcjellin mesazhin e preferuar rilindas – “do të fluturojnë nga puna…nëpërmjet Vetingut”.
