Presidenti Ilir Meta përmes një dekreti, rreth dy javë më parë, anulloi zhvillimin e zgjedhjeve lokale më 30 qershor, për shkak të krizës politike në vend dhe informacioneve që kishte për përplasje të mundshme civile.
Dekreti i Presidentit u botua në Fletoren Zyrtare, çka e ktheu atë në një akt të detyrueshëm për t´u zbatuar nga çdokush, përfshi këtu edhe institucionet.
Pavarësisht qëndrimit të mbajtur nga mazhoranca e drejtuar nga Edi Rama që e konsideron nul dekretin e anullimit të zgjedhjeve dhe përdorimit të KQZ me katër anëtarë socialistë, që mori rolin e një Gjykate Kushtetuese, fakti që dekreti ndodhet i botuar në Fletoren Zyrtare, do të thotë se është i detyrueshëm për zbatim.
Mbrëmjen e djeshme, Vasilika Hysi, deputete e PS, e cilësoi si një gafë botimin e dekretit në Fletoren Zyrtare.
“Kemi publikuar një gafë juridike në fletoren zyrtare.
Kolegët e mi e gjykojnë se është shkelur rëndë kushtetuta dhe ligji. Është një proces i cili i ka hyrë procedurës kushtetuese dhe ligjore dhe që do të vazhdojë”, tha Hysi.
Qendra e Botimeve Zyrtare është institucion në varësi të Ministrisë së Drejtësisë. Sot ajo rregullohet me ligjin nr. 78/2014 “Për organizimin dhe funksionimin e Qendrës së Botimeve Zyrtare” dhe akteve nënligjore në zbatim të tij.
QBZ ka si funksion publikimin e akteve normative në fletoren Zyrtare dhe hyrjen e tyre në fuqi pas publikimt.
Dhe nëse mazhoranca i qëndron idesë se dekreti është një gafë dhe në bazë të saj ka nisur procedurën për shkarkimin e Ilir Metës si President, duket se përgjegjësi politike për botimin e tij do të mbajë edhe ministrja e Drejtësisë, Etilda Gjonaj.
Ndaj nuk është çudi që nëse Rama i reziston krizës politike, ministrja e parë që mund të bëhet kurban për shkak të dekretit të jetë pikërisht Gjonaj, që konsiderohet si pjesë e klanit Xhafaj-Veliaj në rradhët e socialistëve dhe rilindjes. /Boldnews.al/
