Kjo është Qarrishta, fshati i vogël kufitar në lindje të vendit që shtrihet në dy faqe malesh, përballë njëra-tjetrës. Pranë shtëpive prej guri kalon një rrjedhë e kristaltë,në ngjyrë blu. Ai është Zalli i Qarrishtës. Tej, por jo shumë larg, pas mjegullës së hirtë shquhet maja e bardhë e Shebenikut. Ne mbërritëm këtu në të dalë të pranverës dhe u takuam me disa fshatarë. Qetësia e tyre ishte trazuar nga zhurmat e turbinave të një hidrocentrali të sapo vënë në punë. Kishte mes tyre disa shpresëtarë që besonin se kur të binte dimri e të bllokohej rruga, ata do të mund të merrnin energji elektrike për shtëpitë e tyre modeste. Ose së paku, kështu u kishin premtuar.
Në ikje, morëm me vete këto fotografi,mes të cilave edhe disa nga portretet e atyre pak banorëve të mbetur, por që kishin vendosur të mos largoheshin nga fshati e të qëndronin deri në fund.
