Eksperti Hekuran Vladi-Lura ka reaguar përmes një postimi në rrjet lidhur me vendimin e Kolegjit Zgjedhor që la në fuqi zgjedhjet në 30 qershor.
“Këta nuk janë gjyqtarë, janë thjesht njerëz pa integritet profesional, pa norma morale dhe thellësisht antikombëtare.
Një gjyqësor, që vihet në shërbim të ekzekutivit.
Shteti ynë nuk shërben të drejtat themelore dhe praktikisht ka rënë demokracia”, shkruan ai.
Kolegji Zgjedhor rrëzoi kërkesën e tij për t’i çregjistruar partinë nga gara elektorale, duke lënë kështu në fuqi datën 30 qershor për zhvillimin e zgjedhjeve vendore 2019.
Partia për Unitet Kombëtar kërkoi çregjistrim nga zgjedhjet dhe heqjen e emrave të kandidatëve të saj nga fletët e votimit pasi Presidenti i Republikës anuloi zhvillimin e zgjedhjeve në 30 qershor, pa caktuar një datë tjetër për vendoret e këtij viti. Kërkesa u dërgua fillimisht në KQZ, ku u rrëzua dhe për këtë shkak Beqiri bëri ankim në Kolegjin Zgjedhor.
Debati u përqendrua te anullimi i zhvillimit të zgjedhjeve më 30 qershor. Idajet Beqiri tha se pas botimit të dekretit të dytë në Fletoren Zyrtare dhe situatës ku KQZ pretendonte zgjedhje dhe Presidenti jo, elektorati i tij u vu në një situatë absurde. “Duket si luftë me mullinjtë e erës”, tha Beqiri.
Përkundër tij, përfaqësuesit e KQZ i thanë Kolegjit Zgjedhor se dekreti i Presidentit është akt administrativ nul, i pavlefshëm dhe pa asnjë pasojë juridike. Ata argumentuan se kërkesa e Partisë për Unitet Kombëtar kërcënon mbarëvajtjen e procesit, pasi fletët e votimit janë printuar tashmë. Sipas vendimit të shkurtuar të Kolegjit Zgjedhor, një kopje e të cilit u sigurua nga A2 CNN, vendimmarrja ka qenë unanime, pesë me zero, por dy nga gjyqtarët kanë pasur mendim paralel, çka do të thotë që kanë arsyetim të ndryshëm nga kolegët e tyre.
Vendimi i Kolegjit Zgjedhor është i formës së prerë dhe ndaj tij nuk lejohet ankim.
