Partia Socialiste ka mbledhur kryesinë e saj, pak ditë para 30 qershorit, datës kur socialistët po shkojnë të vetëm drejt një procesi, i anulluar me dekretit të Presidentit Ilir Meta. Socialistët kanë vendosur që mitingun përmbyllës të fushatës ta zhvillojnë në Vlorë më 28 qershor.
Mbledhja e kryesisë është drejtuar nga Edi Rama, kryetar i PS dhe kryeministër, i cili ka dhënë porosi lidhur me procesin.
Mësohet se Rama ka kërkuar administrimin sa më korrekt të procesit, si dhe dokumentimin e çdo akti që mund të cënojë atë. Kryeministri ka shprehur bindjen se më 30 qershor do të ketë një process me standarde.
Në mbledhjen e Kryesisë janë dhënë direktiva për atë që njihet si patranozhi i votuesve, pra skema që çdo anëtar i PS-së të bindë disa persona të tjerë për të marrë pjesë në procesin e votimit.
Duket se kjo është sfida kryesore që ka Rama dhe Rilindja për 30 qershorin, përsa kohë përballë kandidatëve të saj nuk ka alternativë dhe opozita ka deklaruar se nuk do të ketë zgjedhje.
Mësohet se Rama ka dhënë paralajmërime të prera se kush prek zgjedhjet do të përballet me ligjin.
“Dokumentoni çdo incident të mundshëm, respektoni Kodin Zgjedhor. Kush prek zgjedhjet do të përballet me pasojat ligjore”, mësohet të ketë porositur Rama, anëtarët e kryesisë, të cilët janë edhe drejtues politik në qarqe.