Kolegji Zgjedhor do të marrë sot në shqyrtim ankimimin e Partisë së Unitetit Kombëtar e drejtuar nga Idajet Beqiri, aleat i Edi Ramës, lidhur me zgjedhjet e 30 qershorit.
PUK i kërkoi KQZ-së çregjistrimin nga zgjedhjet, pas dekretit të Ilir Metës që anullonte mbajtjen e procesit në këtë datë.
Pasi kërkesa e PUK u rrëzua nga KQZ, aleatja e Ramës iu drejtua Kolegjit me një ankimim, i cili në thelb i shërben socialistëve përsa i takon ligjshmërisë së dekretit.
Sipas ekspertëve ligjorë, gjykata e cila mund të shprehet lidhur me dekretet e Presidentit është ajo Kushtetuese. Por socialistët pretendojnë se Gjykata përmes një vendimi i ka cilësuar dekretet për zgjedhjet si akte administrative, çka do të thotë se ato mund të gjykohen nw një Gjykatë Administrative.
Por vetë socialistët nuk kanë bërë asnjë ankimim në gjykatë mbi dekretin, ndërsa rolin e saj e mori KQZ, që përmes 4 anëtarëve socialistë u shpreh për mosnjohjen e dekretit që anullon zgjedhjet më 30 qershor.
Tashmë, Kolegji Zgjedhor përmes ankesës së PUK do të mund të shprehet lidhur me 30 qershorin, edhe pse palët sërisht janë të ndara nëse dekreti mund të merret në shqyrtim nga çdo gjykatë apo vetëm nga Kushtetuesja.
Trupi gjykues i Kolegjit Zgjedhor përbëhet nga Ridvan Hado, Tomor Skreli, Artur Malaj, Lindita Sinanaj dhe Astrit Kalaja. Vetëm njëri nga 5 anëtarët e Kolegjit ka kaluar Vetting, ndërsa 4 të tjerët janë në pritje të procesit.
Një ditë më parë, opozita ngriti pretendimin se vendimi i Kolegjit mund të merrej nën presion, duke akuzuar në këtë mënyrë kryeministrin Edi Rama. Sipas opozitës, e vetmja Gjykatë e cila mund të shprehet lidhur me kushtetueshmërinë ose jo të dekretit që anullon mbajtjen e zgjedhjeve është ajo Kushtetuesja. Kjo e fundit është jashtë çdo funksioni, pasi nga 9 anëtarë të duhet të kishte ka mbetur me vetëm 1 anëtar.
Nuk dihet se çfarë vendimi mund të marrë sot Kolegji, nëse do të shprehet ose jo mbi dekretin, apo thjesht do të trajtojë kërkesën e PUK si një akt administrativ për regjistrim apo çregjistrim në zgjedhje, edhe pse aleati i Ramës në ankesën drejtuar gjykatës zgjedhore e lidh qëndrimin për t’u çregjistruar me dekretin e Presidentit për anullimin e zgjedhjeve.
