Kreu demokrat Lulzim Basha ka thirrur një takim me kryetarë të partive aleate. Takimi pritet të nisë në orën 10:00 në selinë e PD-së, ndërsa burime nga opozita shprehen se në të do të vendoset mbi strategjinë që do të ndjekin partitë opozitare përgjatë kësaj jave.
Tre ditë më parë, në një takim të ngjashëm u vendos organizimi i protestave dhe reagimeve qytetare në çdo bashki ku Edi Rama do të shkojë për të prezantuar kandidatët për kryebashkiakë, ndërsa Lulzim Basha është shprehur i bindur se në 30 qershor nuk do të ketë proces zgjedhor.
Takimi i Bashës me aleatët vjen 1 orë para se Kolegji Zgjedhor të mblidhet dhe të vendosë mbi ankimimin e bërë nga një prej partive, në aleancë me Edi Ramën, lidhur me dekretin e Presidentit.
Ndërkohë në anën tjetër, Edi Rama ka mbledhur kryesinë e PS-së në një takim që ka zgjatur disa minuta dhe ku janë shpërndarë udhëzimet mbi procesin më 30 qershor.
