Kolegji Zgjedhor do të shqyrtojë nesër padinë e Partisë së Unitetit Kombëtar, aleate e socialistëve të Edi Ramës, e cila kërkoi çregjistrimin nga zgjedhjet e 30 qershorit, pas dekretit të Presidentit Ilir Meta për anullimin e tyre.
PUK po bën lojën e socialistëve me këtë padi, duke tentuar në këtë mënyrë të shfuqizojë dekretin, duke qenë se kërkesën e saj drejtuar KQZ-së për çregjistrim nga procesi e ka bazuar pikërisht te dekretit i Presidentit që anullon zgjedhjet.
Përmes padisë së PUK, duket se socialistët do të tentojnë të zhvlerësojnë dekretin e Presidentit, gjithmonë nëse Kolegji do të shprehet në favor të mazhorancës.
Edhe pse dekretet e Presidentit të Republikës janë kompetencë e Gjykatës Kushtetuese për t’u vlerësuar, në kushtet kur s’ka një gjykatë të tillë funksionale, socialistët pretendojnë t’a trajtojnë atë thjesht si një akt administrativ.
Fillimisht ishte KQZ që me një vendim të paprecedentë të 4 anëtarëve socialistë mori përsipër të lunate rolin e gjykatës duke rrëzuar dekretin.
Pas vendimit të KQZ-së nga socialistët nuk u ndërmorr asnjë hap kontestues në gjykatë ndaj dekretit, ndërsa duket se kjo detyrë iu caktua një prej aleatëve të PS-së, partisë që drejtohet nga Idajet Beqiri.
Nesër padia e PUK do të merret në shqyrtim nga trupi gjykues i përbërë nga 5 anëtarët Lindita Sinanaj, Artur Malaj, Tomor Skreli, Astrit Kalaja dhe Ridvan Hado.
Katër anëtarët e Kolegjit nuk i janë nënshtruar ende procesit të vetting, ndërsa Artur Malaj ka kaluar fazën e parë, atë të KPK-së duke u rikonfirmuar në detyrë, pavarësisht problemeve që pati me pasurinë dhe problemeve të evidentuara nga DSIK.
Sot opozita paralajmëroi se vendimi që mund të japë nesër Kolegji, nën presionin politik të Ramës, nuk ka asnjë bazë ligjore, pasi dekretet e Presidentit mund të shqyrtohen vetëm nga Gjykata Kushtetuese.
Por nëse Kolegji do të mbështesë padinë e PUK, kjo mund të shihet si një moment shpëtimi edhe për kryeministrin dhe Rilindjen, që duket se po tentojnë të gjejnë mënyrën sesi të dalin nga vorbulla, pavarësisht se publikisht deklarojnë se janë të gatshëm të përgjigjen sy për sy dhe dhëmbë për dhëmbë.
