Ndër rreziqet që mund të hasni si rrjedhojë e ekspozimit ndaj temperaturave tejet të larta është edhe goditja nga i nxehti.
Në të gjitha situatat e të nxehtit ekstrem apo në temperaturat e larta, ndiqni rekomandimet.
Ekspertët e Institutit të Shëndetit Publik dhe Ministrisë së Shëndetësisë dhe Mbrojtjes Sociale kanë përgatitur udhëzuesin me këshillat që duhet të ndjekin veçanërisht kategoritë më të rrezikuara për të shmangur ndërlikimet e rënda në shëndet.
Specialistët e ISHP-së rekomandojnë të konsumoni sa më shumë ujë, të shmangni konsumimin e alkoolit dhe pijeve me kafeinë, të visheni në përshtatje me motin, ngadalësoni lëvizjet, të mbani freskët shtëpinë tuaj si dhe të shmangni qëndrimin në hapësirat e mbyllura.
Goditja nga dielli mund të quhet më drejtë goditja nga i nxehti, pasi jo domosdoshmërisht një person tek i cili zhvillohet kjo gjendje ka qenë i ekspozuar ndaj diellit. Ajo është një gjendje jo shumë e zakonshme, por nga ana tjetër shumë serioze, me një normë vdekshmërie prej 20%.
Tipari më i rëndësishëm i goditjes nga i nxehti është temperatura jashtëzakonisht e lartë e trupit (105 F [41 C] ose më e lartë), që e shoqëron atë. Në goditjen nga i nxehti, viktima ka ndalim të procesit të djersitjes duke mos qenë në gjendje të eliminojë nxehtësinë e tepërt të trupit grumbulluar gjatë aktivitetit fizik.
Nëse temperatura e trupit rritet së tepërmi, truri, veshkat dhe mëlçia mund të pësojnë dëmtime të përhershme. Ndonëse goditja nga i nxehti prek kryesisht personat mbi 50 vjeç ajo gjithashtu shkakton probleme tek individë të rinj të cilit merren me aktivitet fizik për një periudhë kohore të tejzgjatur.
Shenjat dhe simptomat
Shpeshherë viktima mund të ketë simptoma paraprake si dhimbje koke, të vjella, marramendje, ose dobësi. Frymëmarrja në fillim është e thellë dhe e shpejtë dhe më vonë sipërfaqësore deri në mungesë. Zakonisht viktima skuqet, ka lëkurë të dehidratuar (të thatë) dhe është shumë i nxehtë. Ai ka pupila (bebja e syrit) të zvogëluara dhe puls të shpejtë, të fortë ose të dobët.
Trajtimi i goditjes nga të nxehtit
Nëse jepni ndihmën e shpejtë për goditjen nga i nxehti, mos harroni se bëhet fjalë për një urgjencë jetë a vdekje. Sa më gjatë viktima qendron i mbinxehur aq më shumë rriten shanset e tij për dëmtime të pakthyeshme të organizmit deri vdekje.
Ndihma e shpejtë për goditjen nga i nxehti jepet për të reduktuar nxehtësinë e trupit dhe përfshin: Uljen e nxehtësisë trupore duke aplikuar peshqirë të lagur e të ftohtë në të gjithë trupin si dhe ventilim, pozicionimin e viktimës në vendin më të freskët të mundshëm dhe lehtësimi i veshjes trupore, pozicionimin e viktimës me shpinë dhe këmbët pak të ngritura, rrugët e frymëmarrjes duhet të jenë të lira (të hapura), vendosjen e pakove të ftohta nën krahë, rreth qafës, në kyçet e këmbëve dhe në ije (nëse mund t’i siguroni ato).
