Nga Boldnews.al
Kryeministri Edi Rama në çdo dalje publike dhe në shumicën e qëndrimeve në rrjetet sociale gjithnjë përmend fjalën: “burg”. Këtë ia ofron protestuesve të opozitës dhe drejtuesve të saj.
Kërcënimi nuk është vetëm një formë për të shtuar frikën në popullsi që atij të mos i preket pushteti, por po kthehet në realitet. Që nga 16 shkurti i këtij viti dhe deri më tani janë me dhjetëra qytetarë protestues që gjenden në burg, ndërsa shifra është edhe më e frikshme për mbi 500 të tjerë që po procedohen penalisht në gjendje të lirë.
Gjithashtu, “burgun politik” po e përjeton edhe opozita zyrtare. Sot në qelitë e errëta të Policisë së Shkodrës është deputeti i PD-së me mandat të djegur Bardh Spahia. Më herët edhe Klevis Balliu kaloi tre ditë në paraburgim, ndërsa po mbushet java që dy kryetarët e degës së PD-së në Librazhd dhe Prrenjas janë në dhomat e paraburgimit sepse i zunë paksa udhën eskortës së kryeministrit dhe qëlluan me vezë drejt saj.
Po pas 30 qershorit? Raprezalje e madhe pritet të ketë me arrestime të shumta, burgosje të protestuesve dhe procedime penale që do i jepen në duar këtij gjyqësori të trembur nga vettingu, i cili është i gatshëm të bëjë kompromisin me qeverinë: “burgos protestuesit, të kaloj vettingun”… Kjo është vetëm njëra anë, por duhet parë edhe pak në aspektin praktik. Ku do të dërgohen qindra apo mijëra të arrestuar opozitarë?
Sot burgjet në vend ankohen për mbipopullim. Rilindja po mendon seriozisht që të hapen “amabinte të reja” të burgjeve politike. Një nga mënyrat është që të japë me konçension një oligarku rindërtimin e Burgut të Spaçit dhe të Qafë-Barit, dy institucione famëkeqe të vuajtjes së dënimit që shërbente enkas për të dënuarit politik gjatë sistemit të diktaturës.
Me këtë formë kryeministri dhe taborri i tij që e ndjek vërbërisht, do kenë dy mundësi “përfitimesh”; të fusin në kasafortë arka me para me “ofertën e pakërkuar”… dhe të burgosin frymën e opozitarizimit diku në skutat e humbura të Spaçit.
Koha rikthehet për fatin e keq të shqiptarëve, që sot po vuuajnë terrorin policor që ka urdhra nga lart për të shtypur çdo frymë revolte, e nesërmja do jetë edhe më zi, kur do vihet në funksion edhe “prokuroria politike”, e cila aktualisht është tërësisht në duart e pushtetit.
